Afg‘oniston hukumati qo‘shinlari bilan o‘tgan sutkada yuz bergan to‘qnashuvlar davomida “Tolibon”ning 202 nafar jangarisi yo‘q qilindi, yana 89 nafari yaralandi. Bu haqda Afg‘oniston Mudofaa vazirligi matbuot markaziga tayanib, “Interfaks” xabar berdi.
Mudofaa vazirligi xabariga ko‘ra, Afg‘oniston harbiy havo kuchlarining mamlakat sharqidagi Nangarhor viloyatining Shirzod va Ochin tumanlarida jangarilar to‘plangan nuqtalarga yo‘llagan aviazarbalari natijasida 52 kishi halok bo‘lgan, yana 11 kishi yaralangan. Bundan tashqari, mashina, beshta mototsikl, ko‘plab qurol va o‘q-dorilar yo‘q qilingan.
Mamlakat shimoli-g‘arbidagi Balx viloyatining Chamtal tumaniga yo‘llangan aviazarbalar oqibatida esa “Tolibon”ning 38 a’zosi halok bo‘lgan, 18 kishi yaralangan.
O‘tgan kunda eng faol janglar Nangarhor, G‘azni, Farah, Badg‘is, Balx, Helmand va Kapisa viloyatlarida bo‘lib o‘tgan.
“Tolibon” 12-avgust oqshomida Afg‘onistondagi uchinchi katta shahar bo‘lgan Hirotni ham egallagandi.
Bundan tashqari, “Tolibon” mamlakat shimolidagi Turkmaniston bilan chegaradosh Badg‘is viloyatini, uning ma’muriy markazi — Afg‘onistondagi beshinchi eng katta shahar Qalayi-Nauni ham nazorati ostiga olgan.
Endilikda “Tolibon” Afg‘onistondagi jami 12 ta viloyat markazini nazorat qilmoqda. Al Jazeera telekanalining hukumatdagi manbalarga tayanib xabar berishicha, Afg‘oniston hukumati zo‘ravonlikni tugatish evaziga “Tolibon”ga mamlakatni boshqarishda ishtirok etishni taklif qilgan. “Tolibon” bu taklifga javob berganmi yoki yo‘q, hozircha noma’lum. Ammo, avvalroq “Tolibon” yetakchilari Ashraf G‘ani prezidentlikdan ketmas ekan, Afg‘oniston hukumati bilan muzokara qilmasligini aytgan.
Izoh (0)