Turkiyada o‘rmon yong‘inlarining barchasi o‘chirildi. Bu haqda qishloq va o‘rmon xo‘jaligi vaziri Bakir Pakdemirliga tayanib, “RIA Novosti” xabar berdi.
“Mamlakatimizdagi barcha o‘rmon yong‘inlari o‘chirildi”, — deb yozadi Pakdemirli Twitter’da.
Uning qo‘shimcha qilishicha, 28-iyulda yirik o‘rmon yong‘inlari boshlanganidan beri Turkiyaning 54 viloyatida 299 ta yong‘in o‘chog‘i nazorat ostiga olingan va o‘chirilgan. Eng so‘nggi bo‘lib, Mugla viloyatining Kyoicheyiz tumanidagi yong‘in o‘chog‘i bartaraf etilgan.
Turkiya sog‘liqni saqlash vaziri Faxriddin Ko‘ja avval xabar berganidek, mamlakatda o‘rmon yong‘inlari qurbonlari soni 8 taga yetgan, jabrlanganlar soni 860 dan oshgan.
CNN Türk telekanalining xabar berishicha, Istanbul Texnika universiteti O‘rta Yer dengizi va Egey mintaqalarida yong‘inlar natijasida vayron bo‘lgan o‘rmonlar maydonini sun’iy yo‘ldosh tasvirlari asosida hisoblab chiqqan.
“O‘rmon yong‘inlaridan vayron bo‘lgan hudud 85 ta futbol maydoniga teng. Manavgat viloyati va Istanbulga eng katta zarar yetgan”, — deydi olimlar.
Ta’kidlanishicha, o‘rmon yong‘inlari paytida jami 160 ming gektarga yaqin o‘rmon vayron bo‘lgan. Yong‘inlar Manavgatda 30 ming gektar, Bodrumda 12,6 ming gektar, Marmarisda 8 ming gektar va Antaliyadagi Guzelbog‘ atrofida 6,5 ming gektar o‘rmonlarga zarar yetkazgan.
Shu bilan birga, eng yirik yong‘inlar 2–9-avgust kunlari sodir bo‘lgan. Tadqiqotlar shuni ko‘rsatdiki, bu davrda yuza harorati 90-100 darajagacha ko‘tarilgan.
Mahalliy OAV xabariga ko‘ra, “Olov bolalari” terrorchilik tashkiloti o‘rmon yong‘inlari uchun javobgarlikni o‘z zimmasiga olgan. Turkiya prezidenti Rajab Toyyib Erdo‘g‘on yong‘inlardan vayron bo‘lgan hududlarni tiklash uchun kishi boshiga uch tupdan ko‘chat ekishga va’da berdi.
Izoh (0)