Xitoyning Xubey provinsiyasida suv toshqini 21 kishining hayotiga zomin bo‘ldi, deb xabar bermoqda Global Times. Ta’kidlanishicha, Lyulin shahrida suv sathi 5 metrgacha ko‘tarilgan.
Lyulindagi yog‘ingarchilik miqdori soatiga 100 millimetrdan oshgan. Provinsiya meteorologiya xizmati xabariga ko‘ra, kuchli yomg‘ir 13-avgustgacha davom etadi.
Shuningdek, Turkiyada kuchli suv toshqinlari va ko‘chkilar oqibatida kamida 27 kishi halok bo‘ldi. 13-avgust kuni Turkiya favqulodda vaziyatlar boshqarmasi bir kechada yana 10 kishining jasadi topilganini ma’lum qildi. Shu tariqa Turkiyaning Qora dengiz sohilidagi toshqin qurbonlari soni 27 kishiga yetgan.
Xabarlarga ko‘ra, Kastamonu viloyatida 25 kishi, Sinop viloyatida yana ikki kishi halok bo‘lgan. Bartin viloyatida bir kishining haligacha daragi topilmagan.
Toshqindan zarar ko‘rgan hududlardan vertolyotlar va qayiqlar yordamida 1,7 mingdan ortiq odam evakuatsiya qilingan.
Suv toshqini Turkiya infratuzilmasiga zarar yetkazdi, 330 ga yaqin qishloq elektrsiz qoldi. Beshta ko‘prik qulab tushgan, ko‘pchiligiga shikast yetgan. Suv toshqinidan zarar ko‘rgan hududlarda ko‘p sonli uylar va korxonalar suv ostida qolgan. Yo‘llarning bir qismi yuvilib ketgan.
Iyul oyining ikkinchi yarmida ham Turkiyada suv toshqini yuz bergandi. Mamlakat shimoli-sharqidagi Rizo va Artvin viloyatlarida kuchli yomg‘irlar tufayli suv toshqinlari kelib chiqqan.
Iyul oxirida Turkiya janubida issiq va quruq havo sharoitida o‘rmon yong‘inlari boshlandi. Hukumat taqdim etgan so‘nggi ma’lumotlarga ko‘ra, Antaliya viloyatidagi Manavgat kurort shahrida yetti kishi yong‘in qurboni bo‘lgan. Marmarisda yana bir kishi halok bo‘lgan. Jabrlanganlarning umumiy soni 864 kishiga yetdi.
Izoh (0)