2021-yilning iyul oyi dunyo tarixidagi eng issiq oy bo‘ldi

2021-yilning iyul oyi dunyoning butun kuzatuvlar tarixidagi eng issiq oy bo‘ldi. Bu haqda Amerika OAVlari Milliy okean va atmosfera ma’muriyati ma’lumotlariga tayanib xabar berdi, deb yozadi “Interfaks”

“Iyul, odatda, dunyodagi eng issiq oy, lekin 2021-yilning iyul oyi tarixdagi eng issig‘i bo‘ldi. Bu yangi rekord dunyodagi iqlim o‘zgarishiga tashvish keltiruvchi va zararli yo‘lda hamroh bo‘lib qo‘shilishi mumkin”, — deya ma’muriyat vakili Rik Spinradning so‘zlarini keltirdi OAV.

“Ushbu holatda birinchi o‘rin — eng yomoni”, — deb izohladi ekspert.

Boshqarma ma’lumotlariga ko‘ra, joriy iyul oyida butun dunyo bo‘ylab quruqlik va okean sirtining umumiy harorati 20-asrdagi o‘rtacha 1,67 darajadan yuqori bo‘lgan. Shu bilan birga, kuzatuvlarni ro‘yxatga olish 142 yil oldin boshlangan.

Avvalgi rekord 2016-yilda o‘rnatilgan va bu yilgi rekorddan 0,02 darajaga past bo‘lgan. Osiyo rekord darajadagi eng issiq iyulni qayd etdi, bu 2010-yildagi rekorddan oshib ketdi. Yevropa rekord darajadagi ikkinchi eng issiq iyulni qayd etdi, bu yilgi harorat 2010-yilning iyulidagi daraja bilan bir xil bo‘ldi, lekin 2018-yilning iyulidagi o‘rtacha haroratdan oshmadi. Shimoliy Amerika, Janubiy Amerika, Afrika va Okeaniyada 2021-yilning iyuli tarixdagi eng issiq iyul o‘nligiga kirdi.

Avvalroq Birlashgan Millatlar Tashkilotining Iqlim o‘zgarishi bo‘yicha hukumatlararo guruhi ko‘plab iqlim o‘zgarishlari doimiy bo‘lib qolishi haqida ogohlantiruvchi hisobot e’lon qilgandi. Hisobotda ta’kidlanishicha, agar issiqxona zaharli gazlari zudlik bilan kamaytirilmasa, kelgusi o‘n yilliklarda global o‘rtacha harorat ko‘tarilishini 1,5 yoki hatto 2 darajagacha cheklashning iloji bo‘lmaydi.

Shuningdek, olimlar Arktikada havo harorati sayyoraning boshqa mintaqalariga qaraganda tezroq qiziyotganini ma’lum qilgandi. Bu jarayon esa sayyoradagi ob-havo uchun salbiy oqibatlarga olib kelishi mumkin.