«Толибон» 12 август куни оқшомда Афғонистондаги учинчи катта шаҳар бўлган Ҳиротни ҳам эгаллаган. Бу ҳақда ташкилот спикери Забиҳулло Мужоҳид Twitter’даги саҳифасида маълум қилди.
AFP’нинг Ҳиротдаги вакили ҳам шаҳар полиция маҳкамаси олдида «Толибон» байроғи ўрнатилгани ҳақида хабар берган.
Бундан ташқари, «Толибон» мамлакат шимолидаги Туркманистон билан чегарадош Бадгис вилоятини, унинг маъмурий маркази — Афғонистондаги бешинчи энг катта шаҳар Калайи-Науни ҳам назорати остига олган.
Шунингдек, 12 августда «Толибон» Ғазни шаҳрини ва шу номдаги вилоятни ишғол қилган. Шаҳар мамлакат пойтахти Кобулдан 130 километр жануби-ғарбда жойлашган. Талинкот вилояти ва унинг маъмурий маркази ҳам деярли курашсиз эгалланган.
Афғонистондаги энг катта иккинчи шаҳар Қандаҳор «Толибон» вакиллари ихтиёрига ўтган. Бу расман ўз тасдиғини топмаган, бироқ ҳаракатнинг қуролланган аъзолари шаҳар ичига кирган.
Эндиликда «Толибон» Афғонистондаги жами 12 та вилоят марказини назорат қилмоқда. АҚШ Афғонистондаги ҳарбийларини олиб чиқишни бошлаганидан кейин мамлакатда «Толибон»нинг фаоллашуви кузатилди ва ҳаракат аъзолари ҳукумат армиясига кетма-кет ҳужумлар уюштирмоқда.
Қандаҳор эгаллангани ҳақидаги хабарлардан кейин АҚШнинг Афғонистондаги элчихонаси америкалик фуқароларга тижорат рейслари орқали мамлакатдан чиқиб кетишни тавсия қилган.
Изоҳ (0)