Duradgor, ofitsiant, sportchi. Katta ekranga chiqishdan oldin har qanday ish bilan shug‘ullangan Bollivud aktyorlari

Bollivud kinosanoatidagi ba’zi aktyor va aktrisalar real voqealarga asoslangan film olishga arzigulik taqdirga ega. Ularning ba’zilari haqida ma’lumot beramiz.

Rajikant

Kino sanoatiga kirishdan oldin Rajikant turli ishlarni qilgan. Avvaliga u duradgorlik bilan shug‘ullangan, keyin avtobus konduktori bo‘lib ishga joylashgan. Karyerasini bir nechta spektakllarda rol ijro etishdan boshlagan Rajikant Madras kinematografiya institutiga aktyorlik fakultetiga o‘qishga kirgan. Uning debyut roli 1975-yilda “Nodir ohanglar” filmida bo‘lgan.

Sonakshi Sinha

Sonakshi kollejni tugatib, faoliyatini dizaynerlikdan boshlagan. U “Yuragim boshqasiga tegishli” (2006) loyihasida liboslar dizayneri sifatida ishlagan. Sonakshi filmdagi rollar uchun kurashmasdi, chunki u taniqli kinematograflar oilasidan edi. 2010-yilda Salmon Xon uni “Qo‘rqmas” filmini suratga olish jarayonlariga olib boradi, shundan so‘ng Sonaning aktrisalik faoliyati boshlanadi.

Akshay Kumar

Akshay dastlab jang san’ati bo‘yicha dars berish niyatida Bangkokka ko‘chib o‘tgan. U yerda u aralash jang san’atini o‘rgana boshlaydi, shuningdek, ofitsiant va vino mutaxassisi bo‘lib ishlaydi. Hindistonga qaytgach, Akshay jang san’ati bo‘yicha murabbiy sifatida ishga joylashdi. Shogirdlaridan biri uni o‘zini model sifatida sinab ko‘rishga taklif qilganida uning hayoti tubdan o‘zgarib ketishini xayoliga ham keltirmagan bo‘lsa kerak. Model sifatida shartnoma imzolagach, tez orada unga “Qasam” filmidagi bosh rol taklif qilingan (1991).

Pariniti Chopra

17 yoshida Pariniti ta’lim olish uchun Londonga jo‘nab ketgan. U “Manchester Yunayted” fan-klubining ta’minot bo‘limini boshqargan, bu unga futbol haqida ko‘p narsa bilib olishiga imkon bergan. 2009-yilda bo‘lajak aktrisa Mumbayga qaytib keladi va shu yerda amakivachchasi Priyanka Chopra bilan yashaydi. U faoliyatini Yash Raj Films’da stajyor sifatida boshlagan. 2011-yilda u “Xonimlar Riki Bahlaga qarshi” filmida debyut rolini ijro qilgan.

Ranvir Singh

AQShning Indiana universitetidagi o‘qishini tugatgandan so‘ng, Ranvir Hindistonga qaytadi va reklama sohasida ishlay boshlaydi. U kinodagi debyutini 2010-yilda Yash Raj Films’ning “To‘y marosimi” filmida ijro etadi, unda Anushka Sharma bilan birga rol o‘ynadi. Hozirda u Bollivud yulduzlaridan biri hisoblanadi.

Ritesh Deshmux

Ritesh arxitektura yo‘nalishida diplom olgach, bir yil chet el firmasida mutaxassisligi bo‘yicha ishlaydi. Uning kinodagi karyerasi 2003-yilda Bollivudning “Senga qasamyod qilaman” filmidan boshlangan, u bo‘lajak rafiqasi Jeneliya D’Souza bilan bosh rolni o‘ynagan.

Boman Ironi

Boman Mumbay kollejida ofitsiantlar tayyorlashning ikki yillik dasturini tamomlagan va bir necha yil Toj Mahalda ofitsiant bo‘lib ishlagan. Keyin u fotojurnalist sifatida ishga joylashgan, nihoyat 41 yoshida birinchi marta kinoda suratga tushgan.