Афғонистон ИИВ ходимлари Кобул йўлида «Толибон» эгаллаб олган Ғазни вилоятининг ҳокими Довуд Лагманийни ҳибсга олди. Бу ҳақда маҳаллий ОАВ ҳамда Афғонистон ички ишлар вазирлиги матбуот котиби Мирвайс Станекзайга асосланиб «Интерфакс» хабар қилган.
Маҳаллий матбуот губернатор ва унинг администрасияси ходимларини «Толибон» вакилларига жангсиз таслим бўлиш ва ҳудудни топширганликда айбламоқда.
«Афғонистон вилоятининг губернатори ‘Толибон’ билан келишган, у ва полиция бошлиғига Кобулга кетишига рухаст берилган», — деган Станекзай.
Аввал интернетда қуролланган «Толибон» вакилларининг шаҳарда эркин ҳаракатланаётгани акс этган видеолар тарқалганди.
«Ғазни шаҳрида душманнинг кўплаб муҳим объектлари эгалланди ва энди ‘Толибон’ аъзолари губернатор қароргоҳи томон йўл олмоқда», — деб ёзган «Толибон» матбуот котиби Забиҳулла Мужоҳид.
Лагманий бир неча ой аввал Афғонистон президенти Ашраф Ғани томонидан Фороб вилоятининг губернаторлигига тайинланган, бироқ маҳаллий аҳоли норозилик намойишлари ўтказиб, уни лавозимидан четлатишни талаб қилган. Намойишлар вақтида полиция ҳамда норозилик билдираётган халқ тўқнашувлари оқибатида бир неча киши ҳалок бўлган.
Маҳаллий манбаларнинг хабар беришича, «Толибон» Ғазни шаҳрини эгаллаб олганидан кейин Афғонистон ҳарбий ҳаво кучлари шаҳарда жангарилар тўпланган ҳудудларга ракета зарбалари беришни бошлаган.
Аввал Афғонистон молия вазири «Толибон» туфайли давлат даромадлари камайиб кетиши фонида мамлакатни тарк этган, АҚШ ҳарбий разведкаси «Толибон»нинг Кобулни 90 кун ичида эгаллаб олиши мумкинлигини тахмин қилганди. Шунингдек, Россия мудофаа вазири Сергей Шойгу «Толибон» ҳаракати вакиллари Афғонистоннинг Ўзбекистон ва Тожикистон билан чегараларини назорат қилаётгани ҳақида фикр билдирган.
Изоҳ (0)