Афғонистон ҳукумати қўшинлари билан ўтган суткада юз берган тўқнашувлар давомида «Толибон»нинг 202 нафар жангариси йўқ қилинди, яна 89 нафари яраланди. Бу ҳақда Афғонистон Мудофаа вазирлиги матбуот марказига таяниб, «Интерфакс» хабар берди.
Мудофаа вазирлиги хабарига кўра, Афғонистон ҳарбий ҳаво кучларининг мамлакат шарқидаги Нангарҳор вилоятининг Ширзод ва Очин туманларида жангарилар тўпланган нуқталарга йўллаган авиазарбалари натижасида 52 киши ҳалок бўлган, яна 11 киши яраланган. Бундан ташқари, машина, бешта мотоцикл, кўплаб қурол ва ўқ-дорилар йўқ қилинган.
Мамлакат шимоли-ғарбидаги Балх вилоятининг Чамтал туманига йўлланган авиазарбалар оқибатида эса «Толибон»нинг 38 аъзоси ҳалок бўлган, 18 киши яраланган.
Ўтган кунда энг фаол жанглар Нангарҳор, Ғазни, Фараҳ, Бадғис, Балх, Ҳелманд ва Каписа вилоятларида бўлиб ўтган.
«Толибон» 12 август оқшомида Афғонистондаги учинчи катта шаҳар бўлган Ҳиротни ҳам эгаллаганди.
Бундан ташқари, «Толибон» мамлакат шимолидаги Туркманистон билан чегарадош Бадғис вилоятини, унинг маъмурий маркази — Афғонистондаги бешинчи энг катта шаҳар Қалайи-Науни ҳам назорати остига олган.
Эндиликда «Толибон» Афғонистондаги жами 12 та вилоят марказини назорат қилмоқда. Al Jazeera телеканалининг ҳукуматдаги манбаларга таяниб хабар беришича, Афғонистон ҳукумати зўравонликни тугатиш эвазига «Толибон»га мамлакатни бошқаришда иштирок этишни таклиф қилган. «Толибон» бу таклифга жавоб берганми ёки йўқ, ҳозирча номаълум. Аммо, аввалроқ «Толибон» етакчилари Ашраф Ғани президентликдан кетмас экан, Афғонистон ҳукумати билан музокара қилмаслигини айтган.
Изоҳ (0)