12-avgust kuni Xalq deputatlari Xiva tuman kengashining navbatdan tashqari sessiyasi bo‘lib o‘tdi. Bu haqda viloyat hokimining Telegram’dagi rasmiy sahifasida ma’lum qilindi.
Ma’lum qilinishicha, sessiyada Xiva tumani hokimi lavozimida ishlab kelgan Ozod Matyoqubov egallab turgan vazifasidan ozod etilgan. Sessiyada viloyat hokimi Farhod Ermanov so‘zga chiqib, tumanning ijtimoiy- iqtisodiy rivojlantirish ko‘rsatkichlarini tahlil qilgan, mavjud muammolar va ularni bartaraf qilish bo‘yicha olib borilayotgan ishlarni tanqidiy baholagan.
Viloyat rahbari Xiva tumani hokimi lavozimiga viloyat bandlik bosh boshqarmasi boshlig‘i vazifasida ishlab kelgan Hurmat Matrasulov nomzodini tavsiya etgan.
Xalq deputatlari ushbu nomzodni qo‘llab-quvvatlagan. Ovozga qo‘yish natijalariga ko‘ra, Hurmat Matrasulov Xiva tumani hokimi vazifasini bajaruvchi etib tasdiqlangan.
Eslatib o‘tamiz, Ozod Matyoqubov 2017-yilda Xiva tumani hokimi etib tayinlangandi. Bunga qadar u Qishloq va suv xo‘jaligi vazirligi paxtachilik va texnik ekinlarni rivojlantirish boshqarmasi boshlig‘i lavozimida faoliyat ko‘rsatgan.
Avvalroq Buxoro viloyati davlat soliq boshqarmasi boshlig‘i G‘ijduvon tumani hokimi etib tayinlangani to‘g‘risida xabar berilgandi.
Izoh (0)