Андижон вилоятининг Андижон туманига ҳокимлик қилган Ҳасанбой Ҳакимов 2021 йил 12 август куни 78 ёшида пневмония асоратларидан вафот этди, дея хабар бермоқда «Дарё» мухбири.
Ҳасанбой Ҳакимов 1943 йил Андижон туманида туғилган, Андижон пахтачилик (ҳозирги қишлоқ хўжалиги ва агротехнологиялар) институтини тамомлаган. Меҳнат фаолияти давомида Тошкент қишлоқ хўжалиги машинасозлиги заводида слесар, «Асака мотор таъмир» корхонасида директор ўринбосари, бош муҳандис, директор лавозимларида ишлаган. 1987—1993 йилларда вилоят агросаноат бирлашмаси раиси ўринбосари, «Ўзселхозтехника» вилоят бирлашмаси раиси каби масъул вазифаларда фаолият кўрсатган.
1993 йилдан 2006 йилга қадар Андижон туманини бошқарган. Шунингдек, ўша йиллари Ўзбекистон Республикаси Олий Мажлиси ва маҳаллий кенгаш депутати сифатида ҳам фаоллик кўрсатган.
Эслатиб ўтамиз, 2020 йил 29 сентябрида Андижон вилояти Хонобод шаҳри ҳокими Мусахон Мамадалиев ўткир юрак-қон томир етишмовчилиги касаллигидан, 7 октябрь куни вилоятнинг Олтинкўл тумани ҳокими Назиржон Ўринбоев пневмония касаллиги асоратлари ва ўткир юрак-қон томир етишмовчилигидан вафот этган эди. Бундан ташқари, 2017 йил октябрида вилоятнинг Улуғнор тумани ҳокими Асилбек Юсупов мияга қон қуйилиши оқибатида, 31 июль куни эса 2020 йилнинг 4 мартидан буён Бўстон тумани ҳокими вазифасида ишлаб келаётган Садбархон Мамитованинг оғир хасталикдан вафот этгани ҳақида хабар берилганди.
Изоҳ (0)