AQShda Nyu-York gubernatori shilqimlikda ayblanganidan keyin iste’fo berdi. Shtatni ilk bor ayol rahbar boshqaradi

AQShning Nyu-York shtati gubernatori Endryu Kuomo shilqimlikda ayblanayotgani tufayli iste’fo berdi. Bu haqda NBC News xabar qildi.

“Menimcha, hozirgi sharoitdan kelib chiqib, bir chekkaga o‘tish va hukumatga yana ma’muriyat bo‘lish imkoniyatini yaratish eng yaxshi yordam bo‘ladi deb o‘ylayman”, — degan gubernator.

Kuomo 14 kundan keyin lavozimini tark etadi. Shtatdagi keyingi, 2022-yilda o‘tadigan saylovlarga qadar vitse-gubernator Keti Xokul boshqaruvni o‘z qo‘liga oladi. U Nyu-York shtatining ilk ayol rahbariga aylanadi.

Avgust boshida Nyu-York prokuraturasi nazoratidagi tergov ishlari boshlangan va jarayon davomida Endryu Kuomoning 11 nafar ayolga nisbatan shilqimlik qilgani aniqlangan. Amaldor mazkur ishlarga aloqadorligini inkor qilgan.

AQSh prezidenti Jo Bayden ham Kuomodan iste’foga chiqishni so‘ragan. Nyu-York shtati qonunchilik kengashi gubernatorga impichment e’lon qilishi mumkinligini bildirgan. Kuomo nima bo‘lgan taqdirda ham o‘z o‘rnini bo‘shatishni istamayotgandi.

Kuomo 2011-yildan beri Nyu-York gubernatori lavozimida ishlab kelayotgandi va eng yorqin demokrat-siyosatchilardan biri edi. Uning navbatdagi gubernatorlik muddati 2022-yilning noyabr oyida yakuniga yetishi kutilayotgandi.

Avval Nyu-York aholisiga koronavirusga qarshi emlanish evaziga 100 dollardan to‘lanishi haqida xabar berilgandi.