АҚШ Президенти Жо Байден Афғонистон ҳукуматини ватан учун курашишга чақирди. «Толибон» жангарилари Афғонистоннинг 65 фоизини назорат қилаётгани ҳақидаги хабарлардан сўнг Байден шундай баёнот берган, деб ёзади Reuters.
«Афғонистон раҳбарлари бирлашиши керак, улар ўзи учун, ватани учун курашиши керак», — деди Байден Оқ уйда журналистларга. Шунингдек, у Афғонистон ҳукумати қўшинлари «Толибон»дан кўпроқлигини эслатиб ўтди.
Байден Афғонистондан қўшинларни олиб чиқиш қароридан афсусланмаслигини айтиб, Вашингтон ўтган 20 йил ичида 1 триллион доллардан кўпроқ маблағ сарфлагани ва бу мамлакатда қолдирган минглаб қўшинларидан айрилгани ҳақида гапирди. Унинг сўзларига кўра, АҚШ афғон кучларига йирик авиаёрдамлар, озиқ-овқат ва ускуналар юборишда, шунингдек, маош тўлашда давом этмоқда.
АҚШ Афғонистон ҳукумат қўшинларини қўллаб-қувватлаш мақсадида бир нечта ҳаво ҳужумларини ҳам уюштирди. АҚШ Мудофаа вазирлиги матбуот котиби Жон Кирбининг маълум қилишича, зарбалар «Толибон»га «динамик» таъсир кўрсатган, бироқ Кирби бу ёрдамнинг чекланганини тан олди.
«Ҳеч ким авиазарбалар қуруқликдаги вазиятга боғлиқ ҳамма муаммоларни ҳал қиладиган ечим, дея даъво қилмаган. Биз ҳеч қачон бундай демаганмиз», — деди Кирби.
11 августга ўтар кечаси Афғонистон шимоли-шарқидаги Бадахшон вилояти маркази Файзобод шаҳри «Толибон» томонидан қўлга олинди.
«Кеча тунда мужоҳидларнинг ҳал қилувчи ва тизимли операциясида Бадахшон вилояти маркази Файзобод қўлга олинди. Мужоҳидлар губернатор қароргоҳини, полиция штабини, разведка идорасини ва барча давлат идораларини назорат қилмоқда», — дея Twitter’да хабар қолдирган «Толибон» матбуот котиби Забиулла Мужоҳид.
Мужоҳиднинг хабарига кўра, сўнгги уч кун ичида мамлакатдаги 34 вилоят марказининг тўққизинчиси «Толибон» назоратига ўтган. «Толибон» вакилининг айтишича, ҳозир ҳаракат Нимрўз, Жузжон, Сарипул, Қундуз, Тоҳар, Саманган, Фараҳ, Бағлон ва Бадахшон вилоят марказларини назорат қилмоқда.
Ўз навбатида, 11 август куни эрталаб Афғонистон Мудофаа вазирлиги марказининг хабар беришича, мамлакат жанубидаги Ҳелманд вилояти маркази Лашкаргоҳ шаҳри чеккасида Афғонистон миллий армиясининг мамлакат ҳаво кучлари кўмагида ўтказган қўшма операциялари чоғида «Толибон»нинг 42 жангариси йўқ қилинган, яна 6 киши яраланган.
Бу орада Афғонистон президенти Муҳаммад Ашраф Ғани «Толибон»га қарши курашиш учун мамлакат шимоли-ғарбидаги Балх вилоятининг маркази Мозори Шарифга келди. Маҳаллий ОАВ Афғонистон президенти 11 август куни эрталаб кутилмаган ташриф билан Мозори Шарифга келгани ҳақида хабар берди. Кейинроқ президент матбуот хизмати хабарни тасдиқлади.
Tolo News хабарига кўра, сафар мобайнида президентга унинг маслаҳатчиси, «Ислом бирлиги» партияси етакчиларидан бири Муҳаммад Муҳакик ҳамроҳлик қилади.
10 август оқшомида Афғонистон собиқ вице-президенти, Миллий исломий ҳаракат (МИҲА) партияси етакчиси маршал Абдурашид Дўстум Кобулдан махсус рейс билан Мозори Шарифга келганди. Маршал билан биргаликда МИҲА раиси махсус кучларининг бир неча юз аъзоси Балхга келган. Дўстум Афғонистон шимолида «Толибон» жангариларига қарши курашга раҳбарлик қилиши кутилмоқда.
Изоҳ (0)