Toshkent viloyatida abituriyentni yuqori lavozimlarda ishlovchi tanishlari orqali Toshkent davlat yuridik universitetiga o‘qishga kiritib qo‘yishni va’da qilib, xizmati evaziga 18 ming dollar olgan 26 yoshli shaxs ushlandi, deb xabar beradi O‘zA.
Ma’lum qilinishicha, DXX va Bosh prokuratura huzuridagi Iqtisodiy jinoyatlarga qarshi kurashish departamenti xodimlari tomonidan tezkor tadbir o‘tkazilgan. Tadbirda ushbu shaxs pullarni 27 yoshli Toshkent davlat pedagogika universitetining sobiq o‘qituvchisiga berishi kerak bo‘lgani aniqlangan va tezkor tadbir davom ettirilib, mazkur shaxs ham pullarni olgan vaqtida ashyoviy dalillar bilan qo‘lga olingan.
Shuningdek, 1983-yil Toshkent viloyatida tug‘ilgan, Toshkentdagi universitetlardan birining kafedra mudiri boshqa bir shaxsdan uning tanishini yuqori lavozimlarda ishlovchi tanishlari orqali o‘qishga kiritib qo‘yishni va’da qilib, undan 10 ming dollar olayotgan vaqtida ushlangan.
Bundan tashqari, DXXning Farg‘ona viloyati bo‘yicha boshqarmasi hamda departamentning hududiy boshqarmasi xodimlari tomonidan o‘tkazilgan tezkor tadbirda viloyatdagi institutlardan birining 28 yoshli talabasi mahalliy fuqaroni yuqori lavozimda ishlovchi tanishlari orqali O‘zbekiston davlat jismoniy tarbiya va sport universiteti Farg‘ona filialiga o‘qishga kiritib qo‘yishni va’da qilgani aniqlangan. Mazkur shaxs fuqarodan 5 ming AQSh dollarini olgan vaqtida ashyoviy dalillar bilan qo‘lga olingan.
Talaba ushbu pullarni o‘zi tahsil olayotgan institutning sirtqi bo‘limi bosh mutaxassisi, 1989-yilda tug‘ilgan shaxsga berishi kerak bo‘lgan. Shundan so‘ng tezkor tadbir davom ettirilib, u ham 5 ming AQSh dollarini olgan vaqtida qo‘lga olingan.
Shuningdek, Namangandagi universitetlardan birining 26 yoshli magistranti 2,5 ming dollar evaziga mahalliy fuqaroni Qirg‘izistonning Botken viloyatidagi universitetlardan biriga Iqtisodiyot yo‘nalishiga o‘qishga kiritib, 1-bosqichni tamomlaganlik haqidagi ma’lumotnomani tayyorlatib berishni va’da qilgani ma’lum bo‘lgan.
DXXning Farg‘ona viloyati bo‘yicha boshqarmasi hamda departamentning hududiy boshqarmasi xodimlari tomonidan o‘tkazilgan tezkor tadbirda mazkur shaxs kelishilgan pullarni olgan vaqtida ashyoviy dalillar bilan ushlangan.
Hozirda ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Avvalroq Andijon va Xorazmda pul evaziga abituriyentlarni o‘qishga kiritib qo‘yishni va’da qilgan institut hisobchisi va talaba ushlangani, Andijonda fuqaroning o‘qishini 1500 dollar evaziga O‘shdan Namanganga ko‘chirib berishni va’da qilgan talaba qo‘lga olingandi. Shuningdek, Samarqand va Qashqadaryoda pul evaziga o‘qishga kiritib qo‘yishni va’da qilgan shaxslar ushlangani, Surxondaryo va Farg‘onada fuqarolarni o‘qishga kiritib qo‘yish evaziga pul so‘ragan talabalar qo‘lga tushgani haqida xabar berilgandi.
Izoh (0)