Тошкент вилоятида абитуриентни юқори лавозимларда ишловчи танишлари орқали Тошкент давлат юридик университетига ўқишга киритиб қўйишни ваъда қилиб, хизмати эвазига 18 минг доллар олган 26 ёшли шахс ушланди, деб хабар беради ЎзА.
Маълум қилинишича, ДХХ ва Бош прокуратура ҳузуридаги Иқтисодий жиноятларга қарши курашиш департаменти ходимлари томонидан тезкор тадбир ўтказилган. Тадбирда ушбу шахс пулларни 27 ёшли Тошкент давлат педагогика университетининг собиқ ўқитувчисига бериши керак бўлгани аниқланган ва тезкор тадбир давом эттирилиб, мазкур шахс ҳам пулларни олган вақтида ашёвий далиллар билан қўлга олинган.
Шунингдек, 1983 йил Тошкент вилоятида туғилган, Тошкентдаги университетлардан бирининг кафедра мудири бошқа бир шахсдан унинг танишини юқори лавозимларда ишловчи танишлари орқали ўқишга киритиб қўйишни ваъда қилиб, ундан 10 минг доллар олаётган вақтида ушланган.
Бундан ташқари, ДХХнинг Фарғона вилояти бўйича бошқармаси ҳамда департаментнинг ҳудудий бошқармаси ходимлари томонидан ўтказилган тезкор тадбирда вилоятдаги институтлардан бирининг 28 ёшли талабаси маҳаллий фуқарони юқори лавозимда ишловчи танишлари орқали Ўзбекистон давлат жисмоний тарбия ва спорт университети Фарғона филиалига ўқишга киритиб қўйишни ваъда қилгани аниқланган. Мазкур шахс фуқародан 5 минг АҚШ долларини олган вақтида ашёвий далиллар билан қўлга олинган.
Талаба ушбу пулларни ўзи таҳсил олаётган институтнинг сиртқи бўлими бош мутахассиси, 1989 йилда туғилган шахсга бериши керак бўлган. Шундан сўнг тезкор тадбир давом эттирилиб, у ҳам 5 минг АҚШ долларини олган вақтида қўлга олинган.
Шунингдек, Намангандаги университетлардан бирининг 26 ёшли магистранти 2,5 минг доллар эвазига маҳаллий фуқарони Қирғизистоннинг Боткен вилоятидаги университетлардан бирига Иқтисодиёт йўналишига ўқишга киритиб, 1-босқични тамомлаганлик ҳақидаги маълумотномани тайёрлатиб беришни ваъда қилгани маълум бўлган.
ДХХнинг Фарғона вилояти бўйича бошқармаси ҳамда департаментнинг ҳудудий бошқармаси ходимлари томонидан ўтказилган тезкор тадбирда мазкур шахс келишилган пулларни олган вақтида ашёвий далиллар билан ушланган.
Ҳозирда ушбу шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Андижон ва Хоразмда пул эвазига абитуриентларни ўқишга киритиб қўйишни ваъда қилган институт ҳисобчиси ва талаба ушлангани, Андижонда фуқаронинг ўқишини 1500 доллар эвазига Ўшдан Наманганга кўчириб беришни ваъда қилган талаба қўлга олинганди. Шунингдек, Самарқанд ва Қашқадарёда пул эвазига ўқишга киритиб қўйишни ваъда қилган шахслар ушлангани, Сурхондарё ва Фарғонада фуқароларни ўқишга киритиб қўйиш эвазига пул сўраган талабалар қўлга тушгани ҳақида хабар берилганди.
Изоҳ (0)