O‘zbekistonda “Chegara bilmas shifokorlar” tashkiloti (MSF) Respublika OITSga qarshi kurash markazi bilan hamkorlikda bir qator yuqumli kasalliklar bo‘yicha eskpress-test o‘tkazuvchi ko‘chma laboratoriyani ishga tushirdi. Bu haqda tashkilot matbuot xizmati xabar berdi.
Tantanali ochilish marosimi 6-avgust kuni bo‘lib o‘tgan bo‘lib, unda Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Botir Qurbonov, “Chegara bilmas shifokorlar” tashkilotining O‘zbekistondagi rahbari Andrea Fyori va Respublika OITSga qarshi kurash markazi direktori Qahramon Yo‘ldoshev ishtirok etgan.
Maxsus uskunalar bilan jihozlangan Isuzu avtobusida joylashgan ushbu ko‘chma laboratoriya OIV, gepatit C va jinsiy yo‘l bilan yuqadigan infeksiyalarga test o‘tkazish imkoniyatini oshiradi.
“Ekspress mobil diagnostika bugungi kunda dunyoning ko‘plab mamlakatlarida amaliyotga joriy etilgan. U bizning laboratoriyalarimizda bo‘lgani kabi, OIV, gepatit C va sifilis kabi kasalliklarga joyida tezkorlik bilan barvaqt tashxis qo‘yishga imkon beradi. Ta’kidlash joizki, testlar anonim, tezkor va yuqori darajada malakali tarzda o‘tkaziladi. Shunday qilib, zarurat tug‘ilganda, bemorlarni o‘z vaqtida tibbiyot muassasalariga qayta yo‘naltirish imkoniyati paydo bo‘ladi”, — degan “Chegarasiz shifokorlar” shifokori Dilorom Boboxo‘jayeva.
Xabarda ta’kidlanishicha, ushbu laboratoriyadan har qanday iqlim sharoitlarida foydalanish mumkin, bunda tekshiruvlarning yuqori aniqligi ta’minlanadi, sanitariya-gigiyena va epidemiologik talablarga rioya etiladi, deyiladi xabarda. Laboratoriya jamoasi shifokor va tibbiyot hamshiralaridan (yoki laborant) tarkib topadi.
Yaqin vaqtlarda ushbu ko‘chma laboratoriya Toshkent shahri va viloyati bo‘ylab faoliyat ko‘rsatishi kutilmoqda. Keyinchalik laboratoriya-avtobus faoliyat radiusi yanada kengayishi mumkin.
Izoh (0)