Ўзбекистонда «Чегара билмас шифокорлар» ташкилоти (MSF) Республика ОИТСга қарши кураш маркази билан ҳамкорликда бир қатор юқумли касалликлар бўйича эскпресс-тест ўтказувчи кўчма лабораторияни ишга туширди. Бу ҳақда ташкилот матбуот хизмати хабар берди.
Тантанали очилиш маросими 6 август куни бўлиб ўтган бўлиб, унда Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов, «Чегара билмас шифокорлар» ташкилотининг Ўзбекистондаги раҳбари Андреа Фёри ва Республика ОИТСга қарши кураш маркази директори Қаҳрамон Йўлдошев иштирок этган.
Махсус ускуналар билан жиҳозланган Isuzu автобусида жойлашган ушбу кўчма лаборатория ОИВ, гепатит C ва жинсий йўл билан юқадиган инфекцияларга тест ўтказиш имкониятини оширади.
«Экспресс мобил диагностика бугунги кунда дунёнинг кўплаб мамлакатларида амалиётга жорий этилган. У бизнинг лабораторияларимизда бўлгани каби, ОИВ, гепатит C ва сифилис каби касалликларга жойида тезкорлик билан барвақт ташхис қўйишга имкон беради. Таъкидлаш жоизки, тестлар аноним, тезкор ва юқори даражада малакали тарзда ўтказилади. Шундай қилиб, зарурат туғилганда, беморларни ўз вақтида тиббиёт муассасаларига қайта йўналтириш имконияти пайдо бўлади», — деган «Чегарасиз шифокорлар» шифокори Дилором Бобохўжаева.
Хабарда таъкидланишича, ушбу лабораториядан ҳар қандай иқлим шароитларида фойдаланиш мумкин, бунда текширувларнинг юқори аниқлиги таъминланади, санитария-гигиена ва эпидемиологик талабларга риоя этилади, дейилади хабарда. Лаборатория жамоаси шифокор ва тиббиёт ҳамшираларидан (ёки лаборант) таркиб топади.
Яқин вақтларда ушбу кўчма лаборатория Тошкент шаҳри ва вилояти бўйлаб фаолият кўрсатиши кутилмоқда. Кейинчалик лаборатория-автобус фаолият радиуси янада кенгайиши мумкин.
Изоҳ (0)