Buxoro viloyati Shofirkon tumanida hokimlik zaxirasidagi 16 sotix yerni 14 ming dollarga sotishga uringan shaxs qo‘lga olindi. Bu haqda Bosh prokuratura huzuridagi Departament xabar berdi.
Ma’lum qilinishicha, Departamentning Shofirkon tuman bo‘limi tomonidan viloyat DXX bilan hamkorlikda tezkor tadbir o‘tkazilgan. Tadbirda fuqaro N.X. Buxoro shahar hokimligi zaxirasida bo‘lgan 16 sotix yer maydonini fuqaro X.ga 14 ming dollarga sotishga kelishib olgani aniqlangan. Fuqaro ushbu pullarni ukasi S. orqali olgan vaqtida ashyoviy dalillar bilan ushlangan.
Shuningdek, Departamentning Denov tuman bo‘limi tomonidan o‘tkazilgan tezkor tadbirda ham shu kabi yana bir holatga chek qo‘yilgan. Aniqlanishicha, Sh.P. ismli shaxs fuqaro R.ning ishonchiga kirib, unga “Xazarbog‘” SIU hududidan bog‘dorchilik yo‘nalishida ajratilgan 3 gektar yer maydoni ajratilishi to‘g‘risidagi tuman hokimi qarori prokuratura tomonidan protest kiritilib bekor qilinganini aytgan. Lekin Sh.P. tanishlari orqali ushbu yer maydonini o‘zining foydasiga saqlab qolib, keyinchalik 20 ming dollarga sotishini aytib, oldindan 3 ming dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Farg‘ona, Namangan va Surxondaryoda yerni noqonuniy ravishda sotayotgan shaxslar qo‘lga olingani, Sirdaryoda hokimlik zaxirasidagi 14 gektar yerni 30 ming dollar evaziga rasmiylashtirib berishga uringan ota-bola aniqlangani, Farg‘onada 50 sotix yerni 25 ming dollarga noqonuniy sotmoqchi bo‘lgan MChJ boshlig‘i ushlangani hamda DXX Bo‘stonliqda ot sportiga ajratilgan 25,4 gektar yerni 1,5 million dollarga sotmoqchi bo‘lgan shaxsni qo‘lga olgani haqida xabar berilgandi.
Izoh (0)