Shavkat Mirziyoyev 9-avgust kuni tadbirkorlar bilan uchrashuvga tayyorgarlikning borishi bo‘yicha yig‘ilish o‘tkazdi, deb xabar bermoqda Prezident matbuot xizmati.
Qayd etilishicha, bugungi kunga qadar tadbirkorlardan 13 ming 500 dan ortiq taklif va mulohazalar kelib tushgan. Bu borada tuzilgan respublika shtabi a’zolari ularni birma-bir o‘rganib, har kuni muhokama qilib bormoqda. Tadbirkorlar ko‘targan 12 mingdan ziyod shaxsiy masalalarning yarmidan ko‘pi hozirgi kungacha hal etilgan.
Yig‘ilishda ta’kidlanishicha, 2021-yilning yetti oyida ajratilgan kreditlar hajmi 2020-yilning mos davriga nisbatan 35 foizga o‘sib, 92 trillion so‘mni tashkil qilgan. Shunga qaramay, tijorat kreditlari bo‘yicha foiz stavkalari va muddati qisqaligi tadbirkorlar uchun eng dolzarb masala ekani ayon bo‘lmoqda. Murojaatlarning 42 foizi shu sohaga oid.
Prezident iqtisodiyotga uzoq muddatli resurslarni olib kelish, dollarlashuv darajasini kamaytirish bo‘yicha ko‘rsatmalar berdi.
Ikkinchi dolzarb masala yer va bino ajratish bilan bog‘liq. Bunday murojaatlar 21 foizni tashkil etgan. Tadbirkorlarga bu borada imkoniyatlarni kengaytirish uchun hududlarga ishchi guruhlar yuborib, 2021-yil 1-sentabrdan auksion savdolariga chiqariladigan yer maydonlari va binolar ro‘yxatini shakllantirish vazifasi qo‘yildi.
Xususiy mulkni huquqiy himoya qilish, litsenziya va ruxsatnomalar olish bo‘yicha mingga yaqin murojaatlar kelib tushgani bu yo‘nalishda tizimli muammolar saqlanib qolganini ko‘rsatmoqda. Shuningdek, murojaatlardan infratuzilmaga ulanish borasida ham ko‘plab muammolar borligi ma’lum bo‘lmoqda.
Xabarga ko‘ra, soliq va bojxona sohalari, imtiyoz va preferensiyalardan foydalanishga oid masalalar ham tahlil qilingan. Davlat rahbari har bir murojaatni alohida nazoratga olib, ularga to‘liq yechim topish bo‘yicha mutasaddilarga ko‘rsatmalar berdi.
Eslatib o‘tamiz, avvalroq Prezidentning tadbirkorlar bilan ochiq muloqoti avgust oyining boshida bo‘lib o‘tishi va shu sabab takliflar 31-iyulgacha qabul qilinishi aytilgandi. Keyinroq tadbirkorlarning Shavkat Mirziyoyevga murojaatlarini qabul qilish muddati 10-avgustga qadar uzaytirildi. Ushbu tadbirda tadbirkorlar oldidagi dolzarb muammolar va ularning yechimlari, respublikada biznes muhitini yanada yaxshilash bo‘yicha taklif va tashabbuslar muhokama qilinadi.
Izoh (0)