Microsoft asoschisi Bill Geyts Forbes talqini bo‘yicha dunyoning eng boy odamlari reytingida to‘rtinchi o‘rindan beshinchi o‘ringa tushib ketdi. Bunga Geyts ajrim to‘g‘risidagi kelishuv doirasida sobiq rafiqasi Melindaga o‘z aksiyalarining bir qismini o‘tkazib berishi sabab bo‘lgan.
Foto: Global Look Press
Forbes’da qayd etilishicha, hozir Geytsning mol-mulki 129,6 milliard dollarni tashkil etadi, reytingda u Facebook asoschisi Mark Sukerbergga o‘z o‘rnini bo‘shatib bergan.
Forbes ma’lumotlariga ko‘ra, o‘tgan hafta Geytsning investitsiyalarini boshqaruvchi Cascade Investment fondi Melinda Geytsga 2,4 milliard dollarlik aksiyalarni o‘tkazib bergan. Bu unga may oyida o‘tkazilgan qiymati 3 milliard dollardan ortiq aksiyalarga qo‘shimcha bo‘lgan. Boshqa mulklar qatorida, Melinda Kanada milliy temiryo‘l kompaniyasi, Autination avtodileri, Meksikaning Coca Cola Femsa va Grupo Televisa kompaniyalarining aksiyalariga ega bo‘ldi.
Microsoft asoschisining sobiq turmush o‘rtog‘i ajrashganidan keyin jami qancha olishi aniq emas, chunki u xususiy kompaniyalar aksiyalari yoki ko‘chmas mulk kabi qo‘shimcha aktivlarga ega bo‘lishi mumkin. Mulkni taqsimlash tafsilotlari shartnomada ko‘rsatilgan, uning shartlari oshkor qilinmagan.
27 yillik turmushidan so‘ng Bill va Melinda Geyts may oyida ajrashayotgani haqida e’lon qildi. Shu vaqt ichida ular uch farzandni tarbiyalagan. Ular hayotining yangi bosqichida er-xotin sifatida ortiq rivojlana olmasligini aytdi. Melinda Geyts ajrashgandan keyin familiyasini o‘zgartirishdan bosh tortdi.
2-avgust kuni Bill va Melinda Geyts rasman ajrashdi. Ajrimdan so‘ng Melinda Geytsning boyligi 5,7 milliarddan ziyodga ko‘payib, u dunyoning eng boy ayollaridan biriga aylandi.
