Gurbanguli Berdimuhamedov o‘g‘li bilan birga “Avaza”dagi sportzalga bordi (foto)

2021-yil 1-avgustdan Turkmaniston hukumatidagi rahbarlarni ta’tilga chiqqanini e’lon qilgan mamlakat prezidenti Gurbanguli Berdimuhamedov 7-avgustda “Avaza” milliy sayyohlik zonasida joylashgan “Avaza” sport majmuasiga o‘g‘li Serdar Berdimuhamedov bilan birga bordi. Bu haqda Turkmaniston davlat axborot agentligiga tayanib “Xronika Turkmenistana” xabar berdi.

“Trenajyorlarda bir nechta mashqlarni bajargan prezident o‘zining ajoyib sport formasida ekanligini yana bir bor namoyish qildi”, — deyiladi Turkmaniston davlat axborot agentligining xabarida.

Nashrning qayd etishicha, bosh vazir o‘rinbosari, Turkmanistonda xizmat ko‘rsatgan murabbiy unvoniga ega Serdar Berdimuhamedov ham sport majmuasiga tashrifi davomida bir nechta mashqlarni bajargan.

Eslatib o‘tamiz, Shavkat Mirziyoyev 5-avgust kuni “Avaza” milliy sayyohlik zonasida bo‘lib o‘tadigan Markaziy Osiyo davlatlari rahbarlarining navbatdagi Maslahat uchrashuvida ishtirok etish uchun Turkmanboshiga borgan, u yerda Gurbanguli Berdimuhamedov bilan uchrashuv o‘tkazgan, 6-avgustda Qirg‘iziston prezidenti Sadir Japarov bilan muzokara olib borib, 11—12-mart kunlari Qirg‘iziston prezidentining O‘zbekistonga davlat tashrifi chog‘ida erishilgan kelishuvlar ijrosining borishi batafsil muhokama qilgan, shuningdek, ushbu sanada Markaziy Osiyo davlatlari rahbarlari Turkmanboshidagi sanoat ko‘rgazmasini ko‘zdan kechirgan, Markaziy Osiyo xalqlarining milliy taomlari festivali va tantanali konsertida ishtirok etgan.