“Tolibon” harakati jangarilari Afg‘oniston shimolidagi Samangan viloyatining ma’muriy markazi — Aybek shahri ustidan nazorat o‘rnatdi. Bu haqda Anadolu agentligiga viloyat mahalliy kengashi rahbari o‘rinbosari Muhammad Hoshim Sarvariy ma’lum qildi.
Uning so‘zlariga ko‘ra, 9-avgustga o‘tar kechasi jangarilar Aybek shahriga qaratilgan hujumlarni jadallashtirgan.
Kunning ikkinchi yarmida hukumat kuchlari bilan to‘qnashuvlardan keyin “Tolibon” Samangan ma’muriy markazi ustidan nazoratni o‘z qo‘liga olishga muvaffaq bo‘lgan.
Ayni vaqtda Samanganning 7 ta tumanidan 3 tasi hozircha hukumat kuchlari qo‘l ostida qolmoqda, dedi Sarvariy.
“Tolibon”ning o‘zi ma’lum qilishicha, Aybekdagi barcha ma’muriy binolar jangarilar nazoratiga o‘tgan.
Qayd etilishicha, bu Afg‘onistonda “Tolibon” qo‘l ostiga o‘tgan viloyat poytaxtlarining oltinchisidir. Mahalliy oqsoqollar hukumatdan shaharda janglarni to‘xtatishni so‘raganidan keyin, jangarilar shaharga jangsiz kirgani aytilmoqda. “Gubernator bunga rozi bo‘lib, barcha qo‘shinlarni shahardan chiqarib ketdi”, — dedi viloyat gubernatori o‘rinbosari Sefatulla Samanganiy.
Ayni paytda “Tolibon” o‘z jangarilarining Afg‘oniston shimolidagi eng yirik shahar — Mozori Sharifga kirganini e’lon qildi, ammo bu ma’lum tasdiqlangani yo‘q.
Avvalroq “Tolibon” ikki kecha-kunduz davom etgan janglar oqibatida Juzjon viloyatining Shibirg‘on shahrini qo‘lga kiritgan edi. U “Tolibon” tomonidan so‘nggi bir sutka ichida egallab olingan ikkinchi ma’muriy markazga aylangandi.
Bungacha ular Eron bilan chegaradagi Nimruz viloyati poytaxti Saranj shahriga bostirib kirgan edi, bu esa “Tolibon” so‘nggi besh yil ichida Afg‘oniston viloyatlaridan birining ma’muriy markazini egallab olishi bilan bog‘liq birinchi holat bo‘ldi.
Keyinroq Afg‘oniston xavfsizlik kuchlari “Tolibon” harakati jangarilari bilan janglarda mamlakat shimolidagi Qunduz va Saripul viloyatlarining ma’muriy markazlari ustidan nazoratni qo‘ldan boy berdi. Shuningdek, “Tolibon” harakati Tojikiston bilan chegara yaqinida joylashgan Toxar shimoliy viloyati poytaxti Talukan shahrini egallab olganini ma’lum qildi.
Izoh (0)