Milliarder Bill Geytsning sobiq rafiqasi dunyoning eng boy ayollaridan biriga aylandi. Melinda Geytsning boyligi eri bilan ajrashganidan keyin 5,7 milliarddan ziyodga ko‘paydi, deb xabar bermoqda Bloomberg.
Ularning nikohi rasman bekor qilinganidan keyin Microsoft korporatsiyasi asoschisi Bill Geyts sobiq xotiniga umumiy qiymati 2,5 milliard dollarlik aksiyalarini berdi.
Bill Geytsning investitsiyalarini boshqaruvchi Cascade Investment fondi 5-avgust kuni tadbirkorning sobiq xotini hisobiga Amerikaning eng yirik avtodileri — AutoNation 3,3 milliondan ortiq aksiyalarini o‘tkazgan. Ayni paytda ularning qiymati, taxminan, 390 million dollarga baholanmoqda. Bundan tashqari, Melinda Geyts John Deere korporatsiyasining 2,8 millionta, Canadian National Railway kompaniyasining 9,5 millionta aksiyasini qo‘lga kiritdi. Ushbu aktivlarning umumiy qiymati 2 milliard dollardan oshadi.
Avvalroq Bill Geytsning sobiq rafiqasi Cascade Investment’ning qariyb 3 milliard dollarlik qimmatli qog‘ozlariga ega bo‘lgan edi. Shu tariqa uning boyligi biznesmen bilan ajrashganidan buyon 5,7 milliarddan ziyodga oshib, uni dunyoning eng boy ayollaridan biriga aylantirdi.
27 yillik turmushidan so‘ng Bill va Melinda Geyts may oyida ajrashayotgani haqida e’lon qildi. Shu vaqt ichida ular uch farzandni tarbiyalagan. Ular hayotining yangi bosqichida er-xotin sifatida ortiq rivojlana olmasligini aytdi. Melinda Geyts ajrashgandan keyin familiyasini o‘zgartirishdan bosh tortdi.
Avgust boshida esa ular rasman ajrashdi. Sud hujjatlarida aytilishicha, Bill va Melinda Geyts ajrashish shartnomasini (separation contract) tuzgan, va uning doirasida mulk, qarz va sud xarajatlarini bo‘lishishga kelishib olgan.
The Wall Street Journal xabar berishicha, Melinda Geyts eri jinsiy jinoyatlarda ayblangan moliyachi Jeffri Epshteyn bilan aloqada bo‘lgani sababli ajrashishga qaror qilgan. Bill Geytsning matbuot kotibi tadbirkorlar faqat xayriya ishlarini muhokama qilganini aytgan.
Bloomberg ma’lumotlariga ko‘ra, ajrashuv haqida e’lon qilingandan so‘ng Melinda Geyts turli kompaniyalarning 3 milliard dollardan ortiq aksiyalariga ega bo‘lgan.
Bill Geyts — sayyoradagi eng boy odamlardan biri. Bloomberg uning boyligini 152 milliard dollarga, Forbes jurnali esa 131,4 milliard dollarga baholamoqda. Ushbu nashrlar tomonidan tuzilgan milliarderlar reytingida Bill Geyts to‘rtinchi o‘rinda turadi.