Britaniya hukumati supermarketlarga oziq-ovqat yetkazib berish uchun harbiylarni jalb qilmoqchi

Buyuk Britaniya hukumati yuk mashina haydovchilari yetishmayotgani tufayli supermarketlarga oziq-ovqat yetkazib berish ishiga harbiylarni jalb qilmoqchi. Bu haqda The Sun va The Daily Mail manbalarga tayanib xabar berdi.

Nashrlarning xabariga ko‘ra, Qirollik logistika korpusining 2000 yuk mashina haydovchisiga besh kun davomida supermarketlarga oziq-ovqat va zarur narsalarni yetkazib berish buyurilgan. Hukumat yuk tashishda yordam olish uchun yaqin kunlarda armiyaga rasmiy so‘rov yuborishi kutilmoqda.

The Sun qayd etishicha, harbiylar mehmonxonalarga joylashadi. Bu tadbirlarning barchasi mamlakat Mudofaa vazirligi koronavirus pandemiyasiga javoban 2020-yilning mart oyida boshlagan Rescript operatsiyasi doirasida amalga oshirilmoqda.

Avvalroq, iyul oyi oxirida Britaniya yuk tashuvchilar uyushmasi mamlakatda yuk mashina haydovchilari yetishmayotganini ma’lum qildi. Uyushma ma’lumotlariga ko‘ra, bunga “Breksit”dan keyin mamlakatni 90 ming kishi, shu jumladan, Yevropa Ittifoqining 25 ming ishchisi tark etgani sabab bo‘lgan.

Bu masalani hal qilish uchun Vazirlar Mahkamasi yuk mashinalarini boshqarishga litsenziya olish tartibi soddalashtirilishini e’lon qildi. Ammo yuk tashuvchilar uyushmasi bunday choralar logistikani normallashtirishga yordam bermasligini aytdi: yangi qoidalar kuchga kirishi uchun kamida besh oy kerak bo‘ladi.

Uyushmaning qayd etishicha, muammoni faqat yevropalik ishchilarning Britaniyaga qaytishiga ruxsat berish orqali hal qilish mumkin. Ularning ta’kidlashicha, Britaniyaning ayrim hududlarida, masalan, Shimoliy Irlandiyada maosh 20 foizga oshganiga qaramay, mamlakat fuqarolari orasidan yangi xodimlarni jalb qilish imkonsiz.

Iyul oyi boshida The Guardian Buyuk Britaniyada o‘tkir ishchi kuchi tanqisligi haqida xabar bergandi. Bu “Breksit”dan keyin, shuningdek, koronavirus pandemiyasi davrida chet ellik ishchilarning mamlakatni tark etishi bilan bog‘liq. Gazetaning yozishicha, Buyuk Britaniyada bunday kadrlar tanqisligi 1997-yildan beri qayd etilmagan. Eng keskin ishchi kuchi taqchilligi transport va logistika, mehmonxona xizmati, ishlab chiqarish va qurilishda seziladi. Bundan tashqari, moliyachilar, dasturchilar, buxgalterlar va muhandislar yetishmayapti, deb yozadi The Guardian.

Avvalroq “Breksit”dan keyin Buyuk Britaniyaning Yevropa Ittifoqiga eksport hajmi kamaygani haqida xabar berilgandi.