Microsoft асосчиси Билл Гейтс Forbes талқини бўйича дунёнинг энг бой одамлари рейтингида тўртинчи ўриндан бешинчи ўринга тушиб кетди. Бунга Гейтс ажрим тўғрисидаги келишув доирасида собиқ рафиқаси Мелиндага ўз акцияларининг бир қисмини ўтказиб бериши сабаб бўлган.
Forbes’да қайд этилишича, ҳозир Гейтснинг мол-мулки 129,6 миллиард долларни ташкил этади, рейтингда у Facebook асосчиси Марк Цукербергга ўз ўрнини бўшатиб берган.
Forbes маълумотларига кўра, ўтган ҳафта Гейтснинг инвестицияларини бошқарувчи Cascade Investment фонди Мелинда Гейтсга 2,4 миллиард долларлик акцияларни ўтказиб берган. Бу унга май ойида ўтказилган қиймати 3 миллиард доллардан ортиқ акцияларга қўшимча бўлган. Бошқа мулклар қаторида, Мелинда Канада миллий темир йўл компанияси, Autination автодилери, Мексиканинг Coca Cola Femsa ва Grupo Televisa компанияларининг акцияларига эга бўлди.
Microsoft асосчисининг собиқ турмуш ўртоғи ажрашганидан кейин жами қанча олиши аниқ эмас, чунки у хусусий компаниялар акциялари ёки кўчмас мулк каби қўшимча активларга эга бўлиши мумкин. Мулкни тақсимлаш тафсилотлари шартномада кўрсатилган, унинг шартлари ошкор қилинмаган.
27 йиллик турмушидан сўнг Билл ва Мелинда Гейтс май ойида ажрашаётгани ҳақида эълон қилди. Шу вақт ичида улар уч фарзандни тарбиялаган. Улар ҳаётининг янги босқичида эр-хотин сифатида ортиқ ривожлана олмаслигини айтди. Мелинда Гейтс ажрашгандан кейин фамилиясини ўзгартиришдан бош тортди.
2 август куни Билл ва Мелинда Гейтс расман ажрашди. Ажримдан сўнг Мелинда Гейтснинг бойлиги 5,7 миллиарддан зиёдга кўпайиб, у дунёнинг энг бой аёлларидан бирига айланди.
Изоҳ (0)