Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov ZF-UZ-VAC2001 o‘zbek–xitoy vaksinasining ikkinchi va uchinchi dozalari bilan emlash vaqtincha to‘xtatilgani haqidagi xabarga munosabat bildirdi.
“Ijtimoiy tarmoqlarda O‘zbekiston va Xitoy hamkorligida ishlab chiqarilgan vaksina bilan 2- va 3-marotaba emlash to‘xtatilgani haqida xabar tarqaldi. Ruxsatingiz bilan ushbu holatga aniqlik kiritmoqchimiz. Hozir dunyo hamjamiyatida emlashga munosabat o‘zgargan. Emlash vositalariga bo‘lgan ehtiyoj keskin ortib boryapti. O‘zbekiston sharoitida ham har kuni 350 ming—400 ming aholi koronavirusga qarshi emlanyapti.
Siz yaxshi bilasizki, O‘zbekiston sharoitida koronavirusga qarshi vaksinalar ishlab chiqarilmaydi. Demak, vaksinalarni O‘zbekistonga olib kelinishi va aholining tegishli qatlamini emlash bevosita olib kelingan vaksinalar miqdori bilan bog‘liq”, – deydi Nurmat Otabekov.
Qayd etilishicha, qachonki vaksinaning samaradorligi 50 foizdan yuqori deb baholansa, samarador deb hisoblanadi. Hozirda aholini o‘zbek–xitoy hamkorligida ishlab chiqarilgan vaksina bilan emlash faqat 1-emlashning yakunida 50 foizdan yuqori samaradorlikka erishilyapti.
Bundan tashqari, JSST emlashlar orasidagi intervalni uzaytirish mumkinligini ma’lum qilgan.“Shu bilan birgalikda, JSST e’tirof etyaptiki, qachon vaksinalar ta’minotida uzilishlar bo‘ladigan bo‘lsa yoki vaksinalarni yetkazib berishda qiyinchiliklar bo‘ladigan bo‘lsa, u holda emlashlar orasidagi intervalni bir muncha uzaytirish maqsadga muvofiq.
Bu o‘sha belgilangan muddatda yana 12 haftaga uzaytirilishi mumkin. Bu 3 oy davomida interval saqlashi mumkin degani.
Xabaringiz bor 1-apreldan beri vaksina bilan emlayapmiz. Aynan o‘zbek-xitoy vaksinasi bilan emlash tadbirlari tahlillari shuni ko‘rsatdiki, 2-marotaba emlanishi kerak bo‘lgan aholining 50 foizi, 3-marotaba emlanishi kerak bo‘lgan aholining 70 foizi emlash tadbirlariga kelmagan. Bundan ko‘rinib turibdiki, biz agar ularni 2- va 3-dozani olishligi uchun kelishlarini kutib o‘tirsak, vaqtdan yutqazamiz.
Shu bois ham aholining katta qismida qisman bo‘lsa ham immunitet shakllantirish uchun aynan olib kelingan vaksinani aholi uchun 1-doza vaksinani ishlatishga maqsadga muvofiq deb topdik. Negaki biz birinchi marotaba emlashimiz orqali kasallikka qarshi qisman immunitet shakllantirishimiz, qolaversa, kasallik yuqqan taqdirda ham uni og‘ir asoratlar bilan kechishiga yo‘l qo‘ymasligimiz mumkin bo‘ladi”, – deydi professor.
Nurmat Otabekovning ma’lum qilishicha, JSST hozirda gibrid vaksinalar borasida ish olib boryapti.“Hozir dunyo hamjamiyatida vaksinalariga ehtiyoj keskin ortib boryapti. Aholining vaksinalarga bo‘lgan ishonchi ortyapti. Qolaversa, hozirda dunyo hamjamiyatida 4,5 milliardga yaqin vaksina ishlatildi. Shunday ekan JSST gibrid vaksinalar haqida ham qayg‘uryapti. Bu agar biz biron vaksina bilan emlashni boshlasak, boshqa bir vaksina bilan yakunlash mumkin degani. Bunday holatlarga ehtiyoj bo‘ladigan bo‘lsa, u holda vaksinalar ketma-ketligi haqida o‘ylab ko‘rishyapti.
O‘zbekiston sharoitiga mos ravishda biz olib kelingan vaksinalarni va vaksinatsiya bilan bog‘liq yangiliklarni keng jamoatchilikka yetkazishga tayyormiz. O‘ylaymanki, vaksinalar ta’minotida hech qanday muammolar bo‘lmaydi. Faqat biz imkon qadar ko‘proq aholi qatlamini qamrab olish maqsadida hozir birinchi marotaba emlanayotganlarga vaksinalar ishlatish bilan shug‘ullanyapmiz. Bu kabi axborotlarni biz sizga yetkazamiz.
O‘zbekiston hukumati bevosita SSV va sanitariya epidemiologiya xizmati vaksinalarni mamlakat ehtiyojiga mos ravishda olib kelish tadbirlari bilan shug‘ullanyapti. Lekin dunyodagi vaziyatni tan olishimiz va shunga mos ravishda xatti-harakatlarimizni shakllantirishimiz kerakligini aslo unutmasligimiz kerak”, – deydi Nurmat Otabekov.
Izoh (0)