O‘zLiDeP markaziy kengashining 7-avgust, shanba kuni o‘tkazilgan navbatdan tashqari plenumi boshlanishidan oldin jurnalistlarga intervyu bergan energetika vaziri Alisher Sultonov “Qachondan aholi elektr energiyasi va gazdan shikoyat qilmaydi?”, degan savolga javob qaytardi. Bu haqda “Daryo” muxbiri Mirolim Isajonov xabar bermoqda.
“Rivojlangan davlatni olsangiz ham u yerda elektrdan ham, gazdan ham muammo bo‘ladi. Bu tizim, bu doimiy jonli jarayon. Oxirgi paytlarda ‘svet’ uzilishidan juda ko‘p murojaatlar tushmoqda. Odamzod yaxshi narsaga juda ham tez o‘rganib qoladi-da, eslaylik, besh yil oldin qanday bo‘lganini.
To‘g‘ri, odamlarimiz yaxshi yashashi kerak. Lekin hech narsa birdaniga bo‘lmaydi-ku. Bizga yillar kerak, 2030-yilgacha dastur tuzganmiz. Xalqaro ekspertlar bilan birgalikda konsepsiya ishlab chiqilgan. Bir tomonda elektr energiyani ishlab chiqarishni ko‘paytirish, bu yoqda tarmoqlarni, tizimni modernizatsiya qilish, neft-gaz hajmini ko‘tarish, qazish, ishlab chiqarish va tarqatish bo‘yicha ham katta-katta ishlar qilinyapti.
Muhtaram Prezidentimiz tomonidan bizning sohaga tarixda ajratilmagan mablag‘lar yo‘naltirilyapti: elektr energetika sohasiga ham, gaz sohasiga ham. Biz bularning barchasini sifatli qurib, ishga tushirishimiz kerak. Biz avvallari mutaxassislarni ham yo‘qotganmiz. Hozirgi paytda esa mutaxassislar tayyorlash bo‘yicha tizim yaratib berilyapti”, — dedi Sultonov.
Izoh (0)