ЎзЛиДеП марказий кенгашининг 7 август, шанба куни ўтказилган навбатдан ташқари пленуми бошланишидан олдин журналистларга интервью берган энергетика вазири Алишер Султонов «Қачондан аҳоли электр энергияси ва газдан шикоят қилмайди?», деган саволга жавоб қайтарди. Бу ҳақда «Дарё» мухбири Миролим Исажонов хабар бермоқда.
«Ривожланган давлатни олсангиз ҳам у ерда электрдан ҳам, газдан ҳам муаммо бўлади. Бу тизим, бу доимий жонли жараён. Охирги пайтларда ‘свет’ узилишидан жуда кўп мурожаатлар тушмоқда. Одамзод яхши нарсага жуда ҳам тез ўрганиб қолади-да, эслайлик, беш йил олдин қандай бўлганини.
Тўғри, одамларимиз яхши яшаши керак. Лекин ҳеч нарса бирданига бўлмайди-ку. Бизга йиллар керак, 2030 йилгача дастур тузганмиз. Халқаро экспертлар билан биргаликда концепция ишлаб чиқилган. Бир томонда электр энергияни ишлаб чиқаришни кўпайтириш, бу ёқда тармоқларни, тизимни модернизация қилиш, нефть-газ ҳажмини кўтариш, қазиш, ишлаб чиқариш ва тарқатиш бўйича ҳам катта-катта ишлар қилиняпти.
Муҳтарам Президентимиз томонидан бизнинг соҳага тарихда ажратилмаган маблағлар йўналтириляпти: электр энергетика соҳасига ҳам, газ соҳасига ҳам. Биз буларнинг барчасини сифатли қуриб, ишга туширишимиз керак. Биз авваллари мутахассисларни ҳам йўқотганмиз. Ҳозирги пайтда эса мутахассислар тайёрлаш бўйича тизим яратиб бериляпти», — деди Султонов.
Изоҳ (0)