Prezident Shavkat Mirziyoyev 6-avgust kuni Markaziy Osiyo davlatlari rahbarlarining Maslahat uchrashuvi doirasida Qirg‘iziston prezidenti Sadir Japarov bilan muzokara o‘tkazdi.
O‘zbekiston Prezidenti Sadir Japarovni ilk bor Maslahat uchrashuvida ishtirok etayotgani bilan chin dildan qutladi va bu ko‘p tomonlama “muloqot maydoni” mintaqa farovonligi yo‘lida mamlakatlar sa’y-harakatlarini birlashtirish uchun yaxshi imkoniyatlar yaratishini ta’kidladi.
Uchrashuvda, avvalo, 2021-yil 11-12-mart kunlari Qirg‘iziston prezidentining O‘zbekistonga davlat tashrifi chog‘ida erishilgan kelishuvlar ijrosining borishi batafsil muhokama qilindi.
Yil boshidan buyon tovar ayirboshlash hajmi qariyb 10 foizga ortib, 425 million dollardan oshgani qayd etildi. Iqtisodiyotning ustuvor yo‘nalishlarida, xususan sanoat, qishloq xo‘jaligi, to‘qimachilik, mashinasozlik va boshqa tarmoqlarda qo‘shma loyihalarni amalga oshirish bo‘yicha amaliy ishlar boshlab yuborilgan. Faol madaniy-gumanitar va hududlararo almashinuv olib borilmoqda.
Energetika sohasidagi hamkorlik, xususan, Qambarota-1 gidroelektr stansiyasini birgalikda qurish masalalari ham ko‘rib chiqildi.
Davlat rahbari O‘zbekiston–Qirg‘iziston–Xitoy temiryo‘li strategik ahamiyatga ega ekani, uni qurish bo‘yicha muzokaralarni jadallashtirish muhimligini ta’kidladi.
Qirg‘iziston Prezidenti O‘zbekistonning mintaqada samarali va o‘zaro manfaatli hamkorlikni mustahkamlash borasidagi amaliy sa’y-harakatlarini qo‘llab-quvvatlashini bildirdi. Shavkat Mirziyoyevning Markaziy va Janubiy Osiyo hamkorligini rivojlantirish borasidagi tashabbuslari mintaqaning qardosh xalqlari manfaatlariga xizmat qilishini ta’kidladi.
Barcha sohalardagi aloqalarni izchil rivojlantirish uchun oliy va yuqori darajadagi muloqotni muntazam davom ettirishga kelishib olindi.
Uchrashuvda mintaqaviy va xalqaro ahamiyatiga molik masalalar yuzasidan ham fikr almashildi.
Bundan avval Shavkat Mirziyoyev Turkmaniston prezidenti Gurbanguli Berdimuhamedov bilan uchrashuv o‘tkazgani haqida xabar berilgandi.
Izoh (0)