Президент Шавкат Мирзиёев 6 август куни Марказий Осиё давлатлари раҳбарларининг Маслаҳат учрашуви доирасида Қирғизистон президенти Садир Жапаров билан музокара ўтказди.
Ўзбекистон Президенти Садир Жапаровни илк бор Маслаҳат учрашувида иштирок этаётгани билан чин дилдан қутлади ва бу кўп томонлама «мулоқот майдони» минтақа фаровонлиги йўлида мамлакатлар саъй-ҳаракатларини бирлаштириш учун яхши имкониятлар яратишини таъкидлади.
Учрашувда, аввало, 2021 йил 11-12 март кунлари Қирғизистон президентининг Ўзбекистонга давлат ташрифи чоғида эришилган келишувлар ижросининг бориши батафсил муҳокама қилинди.
Йил бошидан буён товар айирбошлаш ҳажми қарийб 10 фоизга ортиб, 425 миллион доллардан ошгани қайд этилди. Иқтисодиётнинг устувор йўналишларида, хусусан саноат, қишлоқ хўжалиги, тўқимачилик, машинасозлик ва бошқа тармоқларда қўшма лойиҳаларни амалга ошириш бўйича амалий ишлар бошлаб юборилган. Фаол маданий-гуманитар ва ҳудудлараро алмашинув олиб борилмоқда.
Энергетика соҳасидаги ҳамкорлик, хусусан, Қамбарота-1 гидроэлектр станциясини биргаликда қуриш масалалари ҳам кўриб чиқилди.
Давлат раҳбари Ўзбекистон–Қирғизистон–Хитой темир йўли стратегик аҳамиятга эга экани, уни қуриш бўйича музокараларни жадаллаштириш муҳимлигини таъкидлади.
Қирғизистон Президенти Ўзбекистоннинг минтақада самарали ва ўзаро манфаатли ҳамкорликни мустаҳкамлаш борасидаги амалий саъй-ҳаракатларини қўллаб-қувватлашини билдирди. Шавкат Мирзиёевнинг Марказий ва Жанубий Осиё ҳамкорлигини ривожлантириш борасидаги ташаббуслари минтақанинг қардош халқлари манфаатларига хизмат қилишини таъкидлади.
Барча соҳалардаги алоқаларни изчил ривожлантириш учун олий ва юқори даражадаги мулоқотни мунтазам давом эттиришга келишиб олинди.
Учрашувда минтақавий ва халқаро аҳамиятига молик масалалар юзасидан ҳам фикр алмашилди.
Бундан аввал Шавкат Мирзиёев Туркманистон президенти Гурбангули Бердимуҳамедов билан учрашув ўтказгани ҳақида хабар берилганди.
Изоҳ (0)