DTM internetda imtihon savollarini tarqatgan abituriyentlar test sinovlaridan chetlatilganini ma’lum qildi

Davlat test markazi test topshiriqlari aks etgan suratlar tarqalishi yuzasidan izoh berdi. Unga ko‘ra, bir necha abituriyent test jarayonlarida telefondan foydalangani uchun imtihondan chetlatilgan.

Qayd etilishicha, matematika fanidan test topshiriqlari aks etgan 1185323 raqamli test topshiriqlari kitobi diagnostik test sinovlariga taalluqli bo‘lib, 17-may kuni Qarshi shahridagi akademik litseylardan birining o‘quvchilari uchun buyurtma qilingan. Diagnostik test natijasiga ko‘ra, talabgor 90,5 ball (280,5 balldan) to‘plagan. Mazkur test topshiriqlari kitobi 2021/2022-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlariga tegishli emas.

Kimyo fanidan test topshiriqlari aks etgan 1155745 raqamli test topshiriqlari kitobi 5-avgust kuni Toshkent shahrida o‘tkazilgan test sinovlariga taalluqli bo‘lib, mazkur abituriyent test sinovi vaqtida telefondan foydalangani videokuzatuv orqali aniqlanib, Vazirlar Mahkamasining 2018-yil 3-apreldagi 261-son qarori bilan tasdiqlangan “O‘zbekiston Respublikasi oliy ta’lim muassasalarining bakalavriatiga o‘qishga qabul qilish uchun kirish test sinovlarini o‘tkazish tartibi to‘g‘risidagi” nizomning 52-bandiga muvofiq test sinovidan chetlashtirilgan.

Majburiy fanlar blokining O‘zbekiston tarixi va matematika fanlaridan test topshiriqlari aks etgan 1186266 raqamli test topshiriqlari kitobi 5-avgust kuni Qashqadaryo viloyatida o‘tkazilgan test sinovlariga taalluqli bo‘lib, mazkur abituriyent test topshiriqlari kitobi varag‘ini yirtib, tashqariga olib chiqqani uchun Vazirlar Mahkamasining 2018-yil 3-apreldagi 261-son qarori bilan tasdiqlangan “O‘zbekiston Respublikasi oliy ta’lim muassasalarining bakalavriatiga o‘qishga qabul qilish uchun kirish test sinovlarini o‘tkazish tartibi to‘g‘risidagi” nizomning 52-bandiga muvofiq test sinovidan chetlashtirildi.

Biologiya va kimyo fanlaridan test topshiriqlari aks etgan 1235875 raqamli test topshiriqlari kitobi 6-avgust kuni Qashqadaryo viloyatida o‘tkazilgan test sinovlariga taalluqli bo‘lib, mazkur abituriyent test sinovi vaqtida telefondan foydalanayotgani aniqlanib, dalolatnoma asosida test sinovlaridan chetlashtirilgan.

Bundan avval Davlat test markazi internetda tarqalgan test materiallari bo‘yicha izoh bergani hamda DTM biologiya fanidan Milliy sertifikat uchun topshirilgan test natijalarini bekor qilgani haqida xabar berilgandi.