Jizzax viloyatining Sharof Rashidov tumanida haydovchining xavfli harakatlari ortidan yo‘l-transport hodisasi yuzaga keldi, deb xabar beradi IIV YHXBB axborot xizmati.
Ma’lum qilinishicha, 30-iyul kuni tuman hududidan o‘tgan xalqaro ahamiyatga ega M-39 avtomobil yo‘lining 967-kilometrida yo‘l-transport hodisasi sodir bo‘lgan.
Samarqand—Toshkent yo‘nalishida harakatlanib kelayotgan samarqandlik 33 yoshli haydovchi boshqaruvidagi BMW avtomobili katta tezlikda harakatlanib, o‘zi bilan bir yo‘nalishda bo‘lgan 26 yoshli haydovchi boshqaruvidagi Nexia’ni siqib yuborgan. Natijada qashqadaryolik Nexia haydovchisi boshqaruvni yo‘qotib, yo‘lni ajratib turuvchi beton to‘siqqa borib urilgan.
YTH oqibatida Nexia’dagi yo‘lovchiga birinchi tez-tibbiy yordam ko‘rsatilgan.
Olib borilgan tezkor surishtiruv ishlari natijasida BMW haydovchisining shaxsiga aniqlik kiritilgan va hozirda ikkala mashina ham jarima maydoniga joylashtirilgan.
Holat yuzasidan Sharof Rashidov tumani IIB YHXB xodimlari tomonidan surishtiruv harakatlari olib borilmoqda.
Avvalroq Toshkentda Nexia bilan to‘qnashib, ag‘darilib ketgan tez yordam mashinasidagi yo‘lovchi vafot etgani, Surxondaryoda yo‘lning qarama-qarshi tarafiga chiqib ketgan “Jiguli” uch avtomobil bilan to‘qnashishi oqibatida bir kishi halok bo‘lgani, Qashqadaryoda Nexia haydovchisi piyodani urib ketib, voqea joyidan yashiringani to‘g‘risida xabar berilgandi.
Izoh (0)