O‘zbekistonda so‘nggi kunlarda koronavirus bilan kasallanish holatlari ortib borayotgani inobatga olinib, Respublika maxsus komissiyasining qarori bilan 2021-yilning 28-iyunidan mamlakatdagi umumiy ovqatlanish obyektlari — kafe, oshxona va choyxonalarning ishlashiga soat 08:00 dan 20:00 gacha ruxsat berilgan edi. 20-iyuldan esa ularning soat 08:00 dan 20:00 gacha faqatgina ochiq havoda ishlashiga ruxsat berilishi belgilandi. Tadbirkor Zafar Hoshimov va Telegram’dagi “Davletovuz” kanali koronavirusga qarshi kurashda kafe-restoranlarni qurbon qilmasdan, ularga qo‘yilgan cheklovlarni yengillashtirishni taklif qildi.
Zafar Hoshimov kafe va restoranlar faoliyati pandemiya davrida cheklanayotgani tarmoq uchun og‘ir bo‘lmoqda, deb yozmoqda. Uning ta’kidlashicha, kafe va restoranlar tadbirkorlarning asosiy o‘zagi va forposti. Aynan shu sohada eng ijodkor va jasur, hech qanaqa riskdan tap tortmaydigan odamlar to‘plangan. Bu sohaning yaxshisi ham, yomoni ham juda tez ayon bo‘ladi. Mazkur biznes hammaga ham emas. Bu biznesda o‘rtamiyonalik bo‘lmaydi, yoki muvaffaqiyatli bo‘ladi, yoki yo‘q.
“Biz, shaharliklar, mijozlar uchun kafe-restoranlar shunchaki oshqozon g‘amini yeydigan joy emas, balki do‘stlar, yaqinlarimiz va qadrli insonlarimiz bilan uchrashadigan, hayotimizdagi muhim voqealarni nishonlaydigan, muloqot qiladigan, hayajonli daqiqalarni kechiradigan joy hamdir. Kafe va restoranlar muzokaralar uchun juda samarali joy. Chunki bir dasturxon atrofida o‘tirganda ishonch o‘z-o‘zidan mustahkamlanadi, o‘zaro kelishuvlarga juda tez kelinadi. Kafe va restoranlar shu ma’noda shaharning ijtimoiy episentridir”, — deb yozadi tadbirkor.
U ko‘p sayohat qiladigan odam sifatida aynan kafe va restoranlar u yoki bu shahar haqidagi fikrning shakllanishida hal qiluvchi ahamiyat kasb etishini qayd etgan.
Tadbirkor aynan kafe va restoranlar koronavirusga qarshi urushda aybdor deb topilib, qurbonlikka mahkum etilganini tushunmasligini yozgan. “Ishonchim komilki, odamlar aynan kafe va restoranlarda virusni yuqtirib olayotganini isbotlaydigan ishonchli tadqiqotlar yo‘q. Gap, albatta, yuzlab odamlar bilan to‘y-tomosha qilish haqida ketmayapti. Albatta, soat 20:00 gacha ham kafe-restoranlarda odamlar to‘planib qolishi mumkin, qolaversa, mavjud talablarga bo‘ysunmasdan ishlayotgan kafe-restoranlar ham bor. Eng yomoni ham shu”, — deb ta’kidlagan Zafar Hoshimov.
Spot’ning yozishicha, turli hisob-kitoblarga ko‘ra, mamlakatda 2 milliondan ortiq kishi kafe-restoranlar va u yoki bu darajada ularga aloqador bo‘lgan sohalarda faoliyat yuritadi. Restoratorlar ko‘plab odamlar pulsiz qolishi haqida ogohlantirgan.
Zafar Hoshimov yuzaga kelgan ushbu vaziyatni zudlik bilan tuzatish kerakligini aytib, umumiy ovqatlanish muassasalari o‘zini oqlamagan vaqt va joy cheklovlaridan qat’i nazar ham ishlay oladigan bir qator chora-tadbirlar joriy qilish mumkinligini bildirgan.
Telegram’dagi “Davletovuz” kanali esa koronavirusga qarshi kurash, albatta, mantiq va ilmiy xulosalarga asoslansa, iqtisodiyot ham yutqazmasligini, odamlarda ham haqli e’tirozlar tug‘ilmasligini ta’kidlagan.
“Toshkentda yashaydigan odam borki, soat 20:00 dan keyin ishlaydigan ‘elita’ joylarni ham, pana-panada ishlaydigan odmi joylarni ham biladi. Kimdir tanka bilan, kimdir pul bilan, kimdir taqdirga tavakkal qilib ishlayapti. Qariyb 16 oyki, koronavirusga qarshi yaxshigina tajriba to‘pladik. Lekin qadamlarimizda hali ham mantiqsizlik bor. Bir martalik choralar, mantiqsiz xatti-harakatlardan tiyilaylik. Milliardlab mablag‘ sarflab festival-konsert o‘tkazib, so‘ng milliardlab soliq va million odam uchun osh-non beradigan kafe-restoranlarni yopmaylik. Bu yo‘qotishni hech kim qoplamayapti, afsuski. Biz Amerika emasmiz, ‘vertolyot pullarimiz’ yo‘q.
Modomiki shundoq ham kafe-restoranlarni virus o‘chog‘i deb bilishar ekan, balki xodimlarini to‘liq emlagan kafe-restoranlarga to‘liq yoki vaksinaning kamida ikkita dozasini olgan mijozlarni QR-kod orqali xizmat ko‘rsatish uchun qabul qilishga ruxsat berilar. Ham rag‘bat, ham iqtisodiyot yuradi. Aqlli, insofli, mantiqli bo‘laylik. To‘satdan yopib, to‘satdan ochib ishlash — stress. Mavhumlik biznes uchun ham, odamlar uchun ham og‘ir. Maxsus komissiya faoliyati shaffofroq, uning harakatlarini, tashlaydigan qadamlarini prognoz qilish imkoniyati bo‘lsa, ishonch kuchayadi. Hech kim yutqazmaydi”, — degan “Davletovuz”.
Shuningdek, kundalik kasallanish holatlari ortib borayotgan sharoitda Maxsus komissiya ma’lum cheklovlar o‘rnatishi zarurligi tabiiy ekanligini tushungan holda, orttirilgan tajribadan kelib chiqib hamda mamlakatda keng ko‘lamda vaksinatsiya ishlari olib borilayotganini inobatga olib, Zafar Hoshimov bilan birgalikda umumiy ovqatlanish korxonalari epidemiya sharoitida ishlashi borasida quyidagi o‘zgartirishlar kiritish orqali ularning ish vaqti bo‘yicha o‘rnatilgan cheklovlarga barham berishni taklif qilmoqda:
- xodimlari to‘la vaksinatsiya qilingan bo‘lishi;
- kafe va restoranlarda ijtimoiy masofa saqlanishi;
- bir vaqtda xizmat ko‘rsatilishi mumkin bo‘lgan mijozlar soni cheklanishini ko‘zda tutish.
Izoh (0)