Toshkent shahar Yunusobod tumanida bolasi bilan ko‘chada qolgani aytilgan ayol holati Senat tomonidan o‘rganilmoqda. Bu haqda Senat matbuot xizmati xabar berdi.
Qayd etilishicha, 2021-yilning 1-avgust kuni internet tarmoqlarida Toshkent shahrining Yunusobod tumanida 7 yoshli bolasi bilan ko‘chada qolgan ayol haqidagi videomaterial keng tarqaldi.
Unda Sh. ismli ayol 7 yoshli farzandi bilan yozda ko‘chada qolishi, ishlab pul topib, qishda yig‘gan pullariga ijarada turib, kun o‘tkazishi va moddiy ahvoli og‘ir ahvolda ekanligi aytilgan.
Ma’lum qilinishicha, ayolning shart-sharoiti shu kunning o‘zidayoq o‘rganilgan. Dastlabki ma’lumotlarga ko‘ra, fuqaro Namangan viloyatidan Toshkent viloyatiga kelin bo‘lib tushgan. Bu boradagi ma’lumotlar ichki ishlar organlari tomonidan o‘rganilmoqda.
Tezkor ko‘rilgan choralar natijasida fuqaro Yunusobod tumani “Otchopar-1” mahallasidagi yotoqxonaga vaqtincha joylashtirildi. Fuqaroning turmushidagi holati, shart-sharoiti batafsil o‘rganilgandan so‘ng uy-joy bilan ta’minlash masalasi to‘liq hal etiladi.
O‘z o‘rnida mazkur holat Senatning Xotin-qizlar va gender tenglik masalalari qo‘mitasi nazoratida o‘rganilmoqda. O‘rganish natijasi yuzasidan batafsil axborot taqdim etiladi.
Bundan avval Namanganda kanalda oqib ketayotgan ayolni qutqarib qolgan YPX podpolkovnigiga viloyat hokimi qimmatbaho sovg‘a topshirgani hamda Buxoroda 40 yoshli erkak o‘zi bilan ishqiy munosabatda bo‘lib kelgan 39 yoshli ayolni rashk oqibatida o‘ldirgani haqida xabar berilgandi.
Izoh (0)