Тошкент шаҳар Юнусобод туманида боласи билан кўчада қолгани айтилган аёл ҳолати Сенат томонидан ўрганилмоқда. Бу ҳақда Сенат матбуот хизмати хабар берди.
Қайд этилишича, 2021 йилнинг 1 август куни интернет тармоқларида Тошкент шаҳрининг Юнусобод туманида 7 ёшли боласи билан кўчада қолган аёл ҳақидаги видеоматериал кенг тарқалди.
Унда Ш. исмли аёл 7 ёшли фарзанди билан ёзда кўчада қолиши, ишлаб пул топиб, қишда йиғган пулларига ижарада туриб, кун ўтказиши ва моддий аҳволи оғир аҳволда эканлиги айтилган.
Маълум қилинишича, аёлнинг шарт-шароити шу куннинг ўзидаёқ ўрганилган. Дастлабки маълумотларга кўра, фуқаро Наманган вилоятидан Тошкент вилоятига келин бўлиб тушган. Бу борадаги маълумотлар ички ишлар органлари томонидан ўрганилмоқда.
Тезкор кўрилган чоралар натижасида фуқаро Юнусобод тумани «Отчопар-1» маҳалласидаги ётоқхонага вақтинча жойлаштирилди. Фуқаронинг турмушидаги ҳолати, шарт-шароити батафсил ўрганилгандан сўнг уй-жой билан таъминлаш масаласи тўлиқ ҳал этилади.
Ўз ўрнида мазкур ҳолат Сенатнинг Хотин-қизлар ва гендер тенглик масалалари қўмитаси назоратида ўрганилмоқда. Ўрганиш натижаси юзасидан батафсил ахборот тақдим этилади.
Бундан аввал Наманганда каналда оқиб кетаётган аёлни қутқариб қолган ЙПХ подполковнигига вилоят ҳокими қимматбаҳо совға топширгани ҳамда Бухорода 40 ёшли эркак ўзи билан ишқий муносабатда бўлиб келган 39 ёшли аёлни рашк оқибатида ўлдиргани ҳақида хабар берилганди.
Изоҳ (0)