Hokimiyat tepasiga kelgan harbiylar tomonidan tuzilgan Myanma Davlat ma’muriy kengashi mamlakatda vaqtinchalik hukumat shakllantirilganini e’lon qildi. Bu haqda Sinhua agentligi farmonga tayanib xabar berdi, deb yozadi “RBK”.
Hujjatda aytilishicha, Myanma Qurolli kuchlari oliy bosh qo‘mondoni, Davlat ma’muriy kengashi raisi Min Aun Xlayn bosh vazir lavozimini egallaydi.
Myanmada harbiylar 1-fevral kuni yuz bergan davlat to‘ntarishidan keyin hokimiyat tepasiga keldi. Armiya vakillari mamlakat prezidenti Vin Myinni va “Demokratiya uchun milliy liga” hukmron partiyasi rahbarlarini hokimiyatdan chetlatdi. O‘z xatti-harakatlarini ular, go‘yoki, 2020-yil noyabrdagi saylov kampaniyasi chog‘ida yo‘l qo‘yilgan soxtalashtirishlar bilan asosladi.
Davlat to‘ntarishiga javoban katta ko‘lamda norozilik aksiyalari boshlandi. Shu sababli fevral o‘rtalarida mamlakatning yangi rahbariyati internetni uzib qo‘yishiga to‘g‘ri keldi. O‘shanda Reuters kuch vakillari namoyishchilarga qarshi o‘t ochgani, bir qator shaharlarga esa harbiy texnika kiritilganini ma’lum qilgandi. Siyosiy mahbuslarga yordam berish assotsiatsiyasi ma’lumotlariga ko‘ra, 27-mart holatiga mamlakatda mitinglar tarqatilishi chog‘ida halok bo‘lganlar soni 423 kishini, hibsga olinganlar — 2,4 mingdan ziyodni tashkil qilgan.
Izoh (0)