“Tolibon” Afg‘onistonda hokimiyatni harbiy yo‘l bilan egallab oladigan bo‘lsa, ularning hukumati Yevroittifoq va mintaqadagi ko‘pchilik davlatlar tomonidan tan olinmaydi. Bu haqda Yevroittifoqning Afg‘onistondagi maxsus elchisi vazifasini bajaruvchi Tomas Niklasson ma’lum qildi, deb yozadi “Kommersant” Uning qayd etishicha, voqealar rivoji shunday tus olsa, “Tolibon” va Afg‘oniston xalqaro maydonda yakkalab qo‘yiladi.
“Agar ‘Tolibon’ hokimiyatni harbiy yo‘l bilan egallab olsa, u na Yevroittifoq tomonidan va na mintaqaning ko‘pchilik davlatlari tomonidan tan olinadi”, — dedi Niklasson. Uning fikricha, bu holda “Tolibon” hukumati “yakkalangan rejim”ga aylanadi.
Niklassonning ta’kidlashicha, Yevroittifoq mamlakatda vaziyatning bunday rivojlanishidan xavotir bildirmoqda va uning aholisiga gumanitar yordam ajratilishiga urinmoqda. “‘Tolibon’ o‘zlari nima istayotganini ifodalab beradigan aniq-ravshan takliflarni bildirmadi. Bu muzokaralarning bir qismi va ular zaruriy bo‘lgan keyingi qadamga aylanadi”, — dedi u.
Avvalroq Rossiya Afg‘onistondagi hokimiyat “Tolibon” jangarilari tomonidan to‘liq egallab olinishi ssenariysiga tayyorligi, ammo voqealarning bunday rivojlanishini haqiqatdan yiroq deb hisoblashini ma’lum qilgandi.
Afg‘onistondan Amerika qo‘shinlari olib chiqila boshlangandan so‘ng, “Tolibon” Kobul, Qandahor, Mozori-Sharif kabi shaharlarga qator yirik hujumlar uyushtirdi, ammo ularni qo‘lga kirita olmadi. O‘tgan hafta harakat vakillari mamlakat chegaralarining 90 foizini nazorat qilayotganini ma’lum qildi. BMTning ta’kidlashicha, “Tolibon” so‘nggi 20 yil ichidagi eng ko‘p hududlarni o‘z nazoratiga olgan.
To‘qnashuvlar natijasida nafaqat qochqinlar, balki chekinayotgan hukumat qo‘shinlari va jangarilar ham ommaviy ravishda qo‘shni Tojikiston, O‘zbekiston, Pokiston hududlariga kirib kela boshladi. Ushbu davlatlarning rasmiylari chegaralarni mustahkamladi. Xalqaro hamjamiyat Afg‘onistondagi ziddiyatning avj olishini keskin qoraladi va tomonlarni muzokaralar o‘tkazishga chaqirdi.
Izoh (0)