“Ikkimizga ham oltin bera olasizmi?”. Tokio—2020 Olimpiadasida bir xil natija qayd etgan ikki sportchiga oltin medal berildi (video)

Tokio—2020 Olimpiadasining balandlikka sakrash musobaqasida bir yo‘la ikki sportchi oltin medalga ega chiqdi.

Qatarlik sportchi Mutaz Essa Barshim va Italiya vakili Janmarko Tamberi bir xil natija qayd etgan — 2,37 metr.

Tashkilotchilar ikki sportchiga qo‘shimcha urinishni amalga oshirishni taklif qilgan. Barshim “Ikkimizga ham oltin medal bera olasizmi?”, deb so‘ragan. Rasmiy xodim “O‘zingiz hal qiling. Agar shuni xohlasangiz...”, deya javob bergan. Barshim esa italiyalik sportchiga murojaat qilgan: “Tarixda qolamiz, do‘stim”. Shundan so‘ng ular o‘zaro kelishgan holda qo‘shimcha urinishda ishtirok etmaydigan bo‘ldi. Shu tariqa har ikki sportchiga oltin medal taqdim etildi.

Qayd etish kerak, bu Qatar delegatsiyasi uchun Olimpiya o‘yinlari tarixidagi ikkinchi oltin medal bo‘ldi. Tarixdagi birinchisi ham aynan Tokiodagi o‘yinlarda qo‘lga kiritilgandi: 31-iyul kuni og‘ir atletikachi Fares Ibrohim Qatarga ilk oltinni taqdim etgan.