Yunon-rum kurashida yana bir muvaffaqiyatsizlik, Suhrob Xo‘jayev esa Olimpiadadagi eng yaxshi natijasini qayd etdi. O‘zbekistonlik sportchilarning Tokio—2020 10-kunidagi natijalari

Yaponiyaning Tokio shahri mezbonlik qilayotgan Olimpiya o‘yinlarida 2-avgust kuni ikki nafar o‘zbekistonlik sportchi o‘z ishtirokini o‘tkazdi.

Yengil atletika

Bosqon uloqtirish bo‘yicha O‘zbekiston terma jamoasi vakili Suhrob Xo‘jayev saralash bahslarida ishtirok etdi. A guruhida ishtirok etgan sportchi 71,26 metr natija qayd etib, so‘nggi (15) o‘rinda qolib ketdi. Qayd etish kerak, Xo‘jayev bu borada Olimpiya o‘yinlaridagi shaxsiy natijasini yaxshilab oldi. Suhrob avval London—2012 va Rio—2016 Olimpiadalarida ham qatnashib, 65,88 va 70,11 metr natija ko‘rsatgan edi.

Yunon-rum kurashi

Jalg‘asbay Berdimuratov (-77 kg) armanistonlik Karapet Chalyanga qarshi bahs olib bordi. Unda Armaniston vakili 5:0 hisobida g‘alaba qozondi. Keyinchalik Chalyan finalga qadar yetib bora olmadi va Berdimuratov bronza medali uchun kurashda ishtirok etish imkoniyatidan quruq qoldi.

Shu tariqa ushbu sport turi bo‘yicha Tokio—2020 Olimpiadasiga yo‘llanma olgan to‘rt nafar o‘zbekistonlik kurashchidan uch nafari o‘z ishtirokini yakunladi. 3-avgust kuni Rustam Assakalov o‘z ishtirokini o‘tkazadi.