Қирғизистоннинг Боткен вилояти Тош-Тумшуқ қишлоғида тожикистонлик фуқаролар вилоят раҳбарининг машинасини тошбўрон қилди. Бу ҳақда Kloop хабар берди.
29 июль куни Қирғизистон президентининг Боткен вилоятидаги қишлоқларни тиклаш бўйича махсус вакили Маъмиржон Раҳимов, президентнинг вилоятдаги мухтор вакили биринчи ўринбосари Маъруфхон Тулаев ва Оқ-Сой қишлоғи раҳбари Алимбек Собиров Оқ-Сой қишлоғида қурилган уйларни кўздан кечириб бўлгач, Тош-Тумшуқ қишлоғига ташриф буюрган. Расмийлар у ерда ҳам ёниб кетган уйларни кўздан кечирган.
Тахминан, соат 20:10 да ҳудудга яқин Тожикистонга тегишли Хўжа Аъло қишлоғида яшовчи 15-20 нафар Тожикистон фуқароси мансабдорлар ёнига келган. Натижада жанжал бўлиб, тожикистонликлардан бири расмийларнинг машинасига тош отган. Собиров, шунингдек, Хўжа Аъло қишлоғи аҳолиси уни калтаклаганини айтган.
«Расмийлар билан биргаликда вайрон қилинган уйларни текшириш учун Тош-Тумшуққа келгандик. Баҳорги можарода Тожикистон аҳолиси қишлоқдаги учта уйни ёқиб юборган. Биз турган жойда Хўжа Аъло аҳолиси йиғилиб, провокация қилишни бошлади. Мен Тош-Тумшуққа тез-тез бориб тураман, у ердагилар мени танийди. Оломон орасидан икки киши менга ташланди. Улар машинамнинг ойнасини синдирди. Ҳозир тиббий кўрикдан ўтишга келдим», — деган у журналистларга.
Мухтор ваколатхона хабарига кўра, шундан кейин икки мамлакат ҳуқуқ-тартибот органлари вакиллари чегарада учрашиб, воқеани ўрганишни бошлаган.
«Тожикистоннинг Исфара вилояти Ички ишлар бошқармаси бошлиғи Тожикистон фуқароларининг ноқонуний хатти-ҳаракатлари масаласи кўриб чиқилишини, етказилган моддий зарар қопланишини, тош отган Тожикистон фуқароларига нисбатан қонун доирасида чоралар кўрилишини ваъда қилди. Айни пайтда Қирғизистоннинг Боткен вилояти ва Тожикистоннинг Исфара вилояти ҳокимлари, шунингдек, икки мамлакатнинг минтақавий ҳуқуқ-тартибот идоралари вакиллари ўртасида учрашув бўлиб ўтмоқда», — дейилади ваколатли идорада.
Эслатиб ўтамиз, апрель ойи охирида Қирғизистон ва Тожикистоннинг чегараолди вилоятлари аҳолиси ўртасидаги зиддият икки мамлакат ҳарбийларининг қуролли тўқнашувига айланиб кетганди. Қирғиз-тожик чегарасидаги низоларда 50 дан ортиқ одам ҳалок бўлган, 300 дан ортиқ уйлар ва инфратузилма объектлари вайрон қилинган, айрим бинолар ёниб кетган. 29 апрель оқшомида томонлар низони тўхтатиш ва чегарадан ҳарбий кучларни олиб кетиш тўғрисида келишиб олган, аммо эртаси куни яна отишма бошланган. 30 апрель куни тушдан кейин навбатдаги сулҳга эришилди. 3 май куни Қирғизистон ва Тожикистон ўз ҳарбий кучларини чегара чизиғидан олиб чиқишни якунлади.
5 июнь куни Тожикистон ва Қирғизистон давлат хавфсизлик қўмиталари раҳбарлари чегарадан қўшинларни олиб кетиш ҳақида келишиб олди.
Изоҳ (0)