Toshkentda tajriba tariqasida atrof-muhitni nazorat qilish bo‘yicha jamoat inspektorlarini jalb qilish amaliyoti kengaytiriladi, deb xabar beradi “Gazeta.uz”.
Ekologiya va atrof-muhitni muhofaza qilish qo‘mitasi raisi Alisher Maqsudov 26-iyul kuni Sergeli tumanida amalga oshirgan sayyor qabulida avgustning ikkinchi yarmidan boshlab shaharning har bir mahallasida bir nafardan faolga jamoat ekoinspektori guvohnomasi berilishini ma’lum qilgan.
Ular Davlat ekologiya qo‘mitasi inspektorlari bilan daraxtlarning noqonuniy kesilishi, belgilanmagan joylarga chiqindilarning tashlanishi, shuningdek, turli tashkilotlar tomonidan atmosfera va suv resurslariga zararli moddalar chiqarib yuborilishining oldini olishda hamkorlik qiladi.
Ma’lum qilinishicha, jamoat inspektorlari qo‘mitaning malakani oshirish markazida o‘qitiladi.
Avvalroq Surxondaryoda 109 tup qimmatbaho daraxtni noqonuniy kesgan mas’ul xodim jarimaga tortilgani, Bekobodda hovlisi yonidagi 2 tup chinorni kesgan oila 131 million so‘m zararni to‘lashi, O‘zbekistonda daraxt ekib, parvarish qilmagan mutasaddi tashkilotlarni jarimaga tortish taklif qilingani hamda O‘zbekistonda to‘rt oy davomida 2000 dan ziyod noqonuniy daraxt kesish holatlari aniqlangani haqida xabar berilgandi.
Izoh (0)