Тошкентда тажриба тариқасида атроф-муҳитни назорат қилиш бўйича жамоат инспекторларини жалб қилиш амалиёти кенгайтирилади, деб хабар беради «Gazeta.uz».
Экология ва атроф-муҳитни муҳофаза қилиш қўмитаси раиси Алишер Мақсудов 26 июль куни Сергели туманида амалга оширган сайёр қабулида августнинг иккинчи ярмидан бошлаб шаҳарнинг ҳар бир маҳалласида бир нафардан фаолга жамоат экоинспектори гувоҳномаси берилишини маълум қилган.
Улар Давлат экология қўмитаси инспекторлари билан дарахтларнинг ноқонуний кесилиши, белгиланмаган жойларга чиқиндиларнинг ташланиши, шунингдек, турли ташкилотлар томонидан атмосфера ва сув ресурсларига зарарли моддалар чиқариб юборилишининг олдини олишда ҳамкорлик қилади.
Маълум қилинишича, жамоат инспекторлари қўмитанинг малакани ошириш марказида ўқитилади.
Аввалроқ Сурхондарёда 109 туп қимматбаҳо дарахтни ноқонуний кесган масъул ходим жаримага тортилгани, Бекободда ҳовлиси ёнидаги 2 туп чинорни кесган оила 131 миллион сўм зарарни тўлаши, Ўзбекистонда дарахт экиб, парвариш қилмаган мутасадди ташкилотларни жаримага тортиш таклиф қилингани ҳамда Ўзбекистонда тўрт ой давомида 2000 дан зиёд ноқонуний дарахт кесиш ҳолатлари аниқлангани ҳақида хабар берилганди.
Изоҳ (0)