Jizzaxda bir tup qayrag‘och daraxtini kesgan fuqaro qariyb 54 mln so‘m to‘laydigan bo‘ldi

Jizzax viloyatining Sharof Rashidov tumanida o‘zboshimchalik bilan bir tup qayrag‘och daraxtini kesgan fuqaroga jarima va keltirilgan zararni to‘lash belgilandi.

Jizzax viloyati Ekologiya boshqarmasi matbuot xizmatining ma’lum qilishicha, fuqaro Y.J. tumanning “G‘ozg‘ontepa” MFYdan kesib o‘tuvchi Jizzax—Zarbdor yo‘li bo‘yidagi uch tup qayrag‘och daraxtini kesishga ruxsat so‘ragan. Ammo boshqarma tomonidan chiqarilgan tegishli xatga asosan ushbu daraxtlarni kesishga ruxsat berilmagan.

Shunga qaramasdan, fuqaro o‘zboshimchalik bilan bir tup qayrag‘och daraxtini kesib, kundakov qilayotgani Sharof Rashidov tumani davlat inspektorlari tomonidan aniqlangan.

Y.J.ga nisbatan BHMning 10 barobari (2 million 450 ming so‘m) miqdorida jarima va 51 million 450 ming so‘m miqdorida tabiatga yetkazilgan zarar belgilandi.

Xabarda aytilishicha, hozirgi kunda qarzni undirish uchun hujjatlar sudga yuborilgan.