27-iyul kuni Mahalla va oilani qo‘llab-quvvatlash vazirligi xalqaro sheriklari bilan “O‘zbekistondagi qishloq ayollarining iqtisodiy imkoniyatlarini kengaytirish” loyihasi bo‘yicha xalqaro grant shartnomasini imzoladi. Bu haqda vazirlik matbuot xizmati xabar berdi.
Yaponiya hukumati Ijtimoiy rivojlanish fondi (JSDF) orqali ushbu maqsadlarga 2,7 million dollardan ortiq mablag‘ ajratadi. Loyiha 2021—2024-yillar davomida Jahon banki bilan hamkorlikda Jizzax va Farg‘ona viloyatining olis qishloqlarida amalga oshiriladi.
Shartnoma mahalla va oilani qo‘llab-quvvatlash vaziri Rahmat Mamatov, Jahon bankining O‘zbekistondagi vakolatxonasi rahbari Marko Mantovanelli hamda Yaponiyaning O‘zbekistondagi elchisi Yoshinori Fudjiyama tomonidan imzolangan.
Loyihaning maqsadi chekka qishloq hududlardagi “ayollar daftari”ga kiritilgan xotin-qizlarning tadbirkorlik ko‘nikmalarini rivojlantirish, bandligini ta’minlash hamda oilalarning iqtisodiy imkoniyatlarini kengaytirishdan iborat.
Ikkinchi bosqichda 350 ta biznes loyiha uchun 1,5 million dollar ajratish orqali qishloq hududidagi ayollar tadbirkorlik faoliyatiga jalb qilinadi hamda grant doirasida moliyalashtirilmagan biznes loyihalar belgilangan tartibda tijorat banklari orqali amalga oshiriladi.
Eslatib o‘tamiz, 2020-yilda O‘zbekistonda ayollarni tadbirkorlikka o‘qitish va bandligini ta’minlash uchun 2 million dollar kredit ajratilishi ma’lum bo‘lgandi.
Izoh (0)