Buxoro viloyatining Vobkent tuman tibbiyot birlashmasi virusolog-shifokori COVID-19 tekshiruvi tahlillarini soxtalashtirgani evaziga pora olayotganda qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Vobkent tuman tibbiyot birlashmasi virusolog-shifokori R.G‘. COVID-19 tekshiruviga ikki nafar fuqarodan tahlil uchun namuna olmay turib, Acer rusumli kompyuter texnikasidan foydalangan holda PZR namunalari uchun elektron bazaga soxta tibbiy ma’lumotlarni kiritgan. Va COVID-19 tekshiruvi tahlillarini soxtalashtirgani evaziga fuqarolar N.N. hamda J.S.dan 300 ming so‘m miqdorida pul talab qilgan.Shifokor 2021-yilning 24-iyul kuni huquqni muhofaza qiluvchi organlar hamkorligidagi tezkor tadbirda kimyoviy ishlov berilgan 300 ming miqdoridagi pulni olayotgan vaqtda qo‘lga olingan.
Mazkur holat yuzasidan R.G‘.ga nisbatan Jinoyat kodeksining 228-moddasi (hujjatlar, shtapmlar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Dastlabki tergov harakatlari olib borilmoqda.
Izoh (0)