Toshkent shahar hokimi Jahongir Ortiqxo‘jayev 28-iyul kuni ko‘p qavatli uylar va aholi zich joylashgan mahallalar hamda unga tutash hududlarda piyodalar yo‘laklarini tashkil qilish to‘g‘risida qarorni imzoladi. Bu haqda “Gazeta.uz” xabar qildi.
Qaror Prezident va bosh vazirning ko‘rsatmalariga muvofiq qabul qilingani qayd etilgan. Qarorda 10 kun ichida istirohat yo‘laklari va dam olish hududlari tashkil etiladigan mahalla ko‘chalarining manzil ro‘yxatini tuzish topshirildi.
Hujjatda ularning joylashuvi aholi uchun xavfsiz va qulay bo‘lishi, qurilish esa xususiy mulkka zarar bermasdan va ko‘p yillik daraxtlarni kesmasdan amalga oshirilishi ta’kidlangan.
Hokimning qarorida istirohat yo‘laklarining uzunligi 200–300 metrgacha bo‘lishi qayd etilgan.
Istirohat yo‘laklarni loyihalashtirishda qattiq qoplamali maydon (asfalt, beton yoki bruschatka qoplamali), piyodalar va velosipedda sayr qilish, bolalarni faol o‘yinlar bilan band bo‘lishi, Workout hududlar, o‘rindiqlar o‘rnatilishiga e’tibor qaratiladi.
Ayrim joylarda ko‘chma savdo do‘konlari va yengil konstruksiyali (muzqaymoq, salqin ichimliklar, fastfud, kiosk va h.k.) xizmat ko‘rsatish shoxobchalari joylashtiriladi. Ularni o‘rnatish uchun yer maydonlarining ijara huquqi “E-ijro auksion” savdo maydonchasida elektron onlayn-auksion orqali amalga oshiriladi.
Yo‘laklar tuman boshqaruv bo‘limlari tomonidan buyurtma qilinadi, bosh dizayner va bosh pudratchi tanlov orqali aniqlanishi kerak.
Loyihalarni muhokama qilishda rezidentlar ishtirok etadimi, yo‘qmi va ular qanday qilib o‘z takliflarini berishi mumkinligi haqida ma’lumot berilmagan.
Eslatib o‘tamiz, hozirda Toshkentda mahallalarni obodonlashtirish ishlari dam olish hududi va bolalar maydonchalari atrofida chegaralar o‘rnatilishi, ichki ko‘chalarni asfaltlash va infratuzilmani yangilash bilan davom etmoqda.
Aprel oyi oxirida Shavkat Mirziyoyev obodonlashtirish uchun poytaxtdagi barcha (520 dan ortiq) mahallalarga o‘rtacha 2 milliard so‘mdan ajratilishini e’lon qilgandi.
Bundan avval Toshkentda bog‘lar, yashil hududlar va xiyobonlar soni ko‘paytirilishi, Shavkat Mirziyoyev Chirchiq daryosi bo‘yidagi obodonlashtirish va qurilish jarayonini ko‘zdan kechirgani hamda O‘zbekistonda daraxt ekib, parvarish qilmagan mutasaddi tashkilotlarni jarimaga tortish taklif qilingani haqida xabar berilgandi.
Izoh (0)