Professional futbol Ligasi (PFL) futbol bo‘yicha O‘zbekiston Superligasi o‘yinlari muxlislarsiz stadionlarda o‘tkazilishini ma’lum qildi.
Bunga Respublika maxsus komissiyasining 5-iyuldagi qarori asos bo‘lgan. Ushbu qarorda ochiq maydonlar yoki yopiq majmualarda bo‘lishidan qat’i nazar, O‘zbekistonda barcha turdagi ommaviy bayram tadbirlari, sport musobaqalari, shuningdek, konsert, festival, teatr va kino dasturlari vaqtincha to‘xtatilishi belgilangan. Biroq sport turlari bo‘yicha musobaqalar muxlislarsiz o‘tkazilishiga ruxsat etilgandi.
Shu tariqa PFL tasarrufidagi barcha musobaqalar, shu jumladan, Superliga o‘yinlari ham muxlislarsiz o‘tkaziladi.
Ayni vaqtda Superliga klublari yozgi tanaffusda bo‘lib turibdi. 30-iyul kunidan chempionat bahslari davom ettiriladi.
Eslatib o‘tamiz, 2020-yilda koronavirus sabab Superliga bahslari ikki bor to‘xtab qolgandi. 2020-yilning iyun oyidan kuzga qadar Superliga uchrashuvlari muxlislarsiz stadionlarda o‘tkazilgandi.
Izoh (0)