Buxorodan Toshkentga kelib chiqishi noma’lum bo‘lgan 900 kg go‘sht olib ketilayotgani aniqlandi

Navoiyda veterinariya-sanitariya talablariga zid ravishda olib ketilayotgan 900 kilogrammga yaqin go‘sht mahsulotlari aniqlandi.

Viloyat IIB matbuot xizmati xabariga ko‘ra, 25-iyuldan 26-iyulga o‘tar kechasi, taxminan, soat 00:20 larda Navoiy viloyati Karmana tumanida joylashgan “Samarqand” YPX maskanida Buxoro—Toshkent yo‘nalishi bo‘ylab harakatlanib ketayotgan M.A. boshqaruvidagi Isuzu Navoiy viloyati IIB YHXB va PPX hamda JTSB karantin tadbirlarini ta’minlash bo‘linmasi xodimlari tomonidan to‘xtatib tekshirilgan.

Tekshiruv davomida avtomobil yukxonasida kelib chiqishi noma’lum bo‘lgan 180 kilogramm yirik shoxli mol go‘shti hamda 720 kilogramm mayda shoxli mol go‘shti, jami 850—900 kilogramm go‘sht Toshkent shahriga olib ketilayotgani aniqlangan.

Ushbu olib ketilayotgan mahsulotlarning sifatiga aniqlik kiritish maqsadida viloyat Veterinariya va chorvachilikni rivojlantirish boshqarmasi hamda mas’ul xodimlar tomonidan tekshirilganda, fuqaro ushbu go‘sht mahsulotlarini veterinariya-sanitariya qoidalari talablariga zid ravishda Toshkent shahriga sotish maqsadida olib ketayotgani ma’lum bo‘lgan.

Holat yuzasidan o‘rnatilgan tartibda Ma’muriy javobgarlik to‘g‘risidagi kodeksning 109-moddasi (veterinariya, veterinariya-sanitariya qoidalari va normalarini buzish)ga asosan ma’muriy bayonnoma rasmiylashtirilgan.