24-iyul kuni tongda Isfaradagi Chorkux jamoatidagi “Qummazor” chegara hududida Tojikiston hamda Qirg‘iziston chegarachilari o‘rtasida qurolli to‘qnashuv sodir bo‘ldi. Bu haqda Asia-Plus xabar bergan.
Agentlik manbasi bergan xabarga ko‘ra, Chorkux jamoati aholisi “Qummazor”dagi yerda hashar o‘tkazmoqchi bo‘lgan.
“Aholi vakillari shanbalikka chiqqan vaqtda qirg‘iz chegarachilari ularning ishlashiga qo‘ymadi. Ular o‘z vatandoshlarini provokatsiya qildi va ular tojikistonliklarga toshlar otishdi, chegarachilar ham fuqarolarimizga qarata o‘q uzdi”, – deya Asia-Plus’ga ma’lumot bergan suhbatdosh.
Voqeaga guvoh bo‘lganini qayd etgan fuqaroning aytishicha, “Qummazor” qadimgi shifobaxsh yer va har yili hashar yo‘li bilan obod qilinadi.
“Nima uchun bizga o‘zimizga tegishli ‘Qummazor’ni tozalashimizga xalaqit qilishadi. Bu tarixiy joy, bizning hudud va yuz yillar davomida tojik xalqi dardiga shifo bo‘lgan yer”, – degan agentlik manbasi.
Shuningdek, Asia-Plus suhbatdoshi tojikistonlik chegarachilar ham qirg‘izistonliklarning hujumiga javob qaytargani, o‘q uzgan askarlarga javob tariqasida o‘q uzganini qayd etgan. Otishma 10-15 daqiqa davom etgan. Biroq yaralanganlar yoki boshqa jarohatlar olganlar haqida ma’lumot berilmagan.
Isfara ma’muriyati matbuot xizmati chegara hududidagi jamoatda ikki mamlakat chegarachilari va aholisi o‘rtasida nizo sodir bo‘lganini tasdiqlagan va shahar hokimi rahbarligidagi delegatsiya voqea joyiga borganligini xabar qilgan.
Shuningdek, Asia-Plus nashri bergan axborot bo‘yicha mahalliy shifokorlardan biri bir nafar yaralangan askarning shahar kasalxonasiga yuborilganini bildirgan.
“Bugun mahalliy vaqt bilan taxminan soat 10:30 da ‘Qummazor’ tomondan 2002-yilda tug‘ilgan, o‘ng oyog‘i o‘qotar qurol bilan yaralangan askarni olib kelishdi. Biz unga birinchi tez tibbiy yordamni ko‘rsatib, Isfaradagi markaziy shifoxonaning travmatologiya bo‘limiga jo‘natdik. Biz uning qanday qilib yaralangani haqida tafsilotlarni bilmaymiz, ammo uni kasalxonaga olib kelgan sheriklari askarning ehtiyotsizlik oqibatida o‘ziga o‘zi jarohat yetkazib qo‘yganini aytdi”, – degan Chorkux jamoatidagi shifokor.
Qirg‘iziston OAV chegarada sodir bo‘lgan hodisa bo‘yicha aniq axborot bermagan. “24.kg” o‘z manbalariga tayanib, Botken viloyatidagi qirg‘iz-tojik chegarasida otishma bo‘lganini xabar qilgan.
“Hodisa bugun taxminan 10:30 da Botken viloyatining ‘Qummazor’ qishlog‘i yaqinida yuz bergan. Chegarachilar o‘q uzgan. Dastlabki ma’lumotlarga ko‘ra, yaralanganlar, otishma oqibatida jarohatlanganlar yo‘q”, – deyiladi agentlik xabarida.
Keyinchalik agentlik hodisa joyiga Qirg‘iziston chegarachilari, mahalliy hokimlik organlari va aholi vakillari yetib kelganini ma’lum qilgan. Xabarda qayd etilishicha, Tojikiston tomoni Qirg‘iziston vakillarining ishlarni to‘xtatish bo‘yicha talabini bajarmagan. Shuningdek, tojikistonliklar Qirg‘iziston fuqarolaridan birini do‘pposlamoqchi bo‘lgan. Ikki tomonning kelishuvga erisha olmasligi oqibatida o‘rtada janjal chiqib, odamlar bir-biriga toshlar uloqtirishni boshlagan.
Nizo oqibatida tojikistonlik chegarachilar Qirg‘iziston tomonga o‘q uzgan, bunga javoban qirg‘iz chegarachilari ham Tojikiston tomonga o‘q otgan.
Qirg‘iziston chegarachilari va aholisi orasida mazkur otishma oqibatida jarohatlanganlar yo‘q.
“24.kg” Botken viloyatida Qirg‘izistonning Botken hamda Tojikistonning So‘g‘d yo‘nalishi bo‘yicha chegara vakillari o‘rtasida uchrashuv bo‘lganini ham xabar qilgan.
“Uchrashuv yakunlari bo‘yicha Qirg‘izistonning ‘Qummazor’ va Tojikistonning ‘Samanyon’ (‘Daxman’) hududida ishlar o‘tkazmaslik yuzasidan kelishuvga erishilgan”, —deyiladi Qirg‘iziston chegara xizmatining ma’lumotida.
Bu kabi holatlar yana takrorlanishining oldini olish maqsadida chegara xizmatlari vakillarining o‘z hududlarida qat’iy tartib-intizomga rioya etishiga kelishib olingan. Shuningdek, ikki respublika Ichki ishlar vazirliklarining bo‘linmalari mazkur chegara uchastkalarida patrul tadbirlarini olib boradi.
Qayd etilishicha, uchrashuvda ikki mamlakat tumanlarining rahbarlari hamda viloyatlarning huquq-tartibot idoralari rahbarlari qatnashgan.
Avval 2021-yil 9-iyulda qirg‘iz-tojik chegarasida otishma yuz bergani, qirg‘izistonlik harbiy xizmatchi halok bo‘lgani xabar qilingan edi.
Izoh (0)