Ozarbayjon yana Armanistonga ikki mamlakatning hududiy yaxlitligini tan olish va chegaralarni belgilab olish to‘g‘risida tinchlik shartnomasi imzolashni taklif qildi. Bu haqda Ozarbayjon prezidenti Ilhom Aliyevga tayanib, “Kommersant” xabar berdi.
Aliyevning ta’kidlashicha, Rossiya va Ozarbayjon Tog‘li Qorabog‘ mojarosini tugagan, deb hisoblaydi.
“Biz Armanistonga kun tartibini — tinchlik shartnomasini yubordik. U istamasligini aytsin, rad etishini aytsin. Men ko‘p marta aytganman, yana aytaman: biz tayyormiz, kel, muzokaralarni boshlaymiz. Urush tugadimi? Tugadi. Sen tinchlikni xohlaysanmi, Armaniston? Aftidan, xohlaysan. Unda nega tinchlik shartnomasini imzolamayapsan? Bizning hududiy yaxlitligimizni tan oling, tinchlik shartnomasini imzolang va chegaralarni delimitatsiya qilish masalasini hal qiling. Shu munosabat bilan bizning kun tartibimiz Yevropa Ittifoqi, Turkiya va Rossiyaning kun tartibiga mos keladi”, — dedi Aliyev AzTV davlat telekanaliga bergan intervyusida. “Biz — Rossiya va Ozarbayjon urush tugaganiga, ziddiyat barham topganiga ishonamiz”, — deya qo‘shimcha qilgan u.
Ozarbayjon prezidentining so‘zlariga ko‘ra, 2020-yil 10-noyabrda imzolangan Tog‘li Qorabog‘ bo‘yicha tinchlik bitimiga muvofiq ochilishi kerak bo‘lgan Zangezur yo‘lagi masalasida Armaniston “qandaydir o‘yin qilmoqchi”.
“Mintaqadagi barcha kommunikatsiyalar bir vaqtning o‘zida ochilishi va alohida yondashuv qo‘llanilmasligi kerak. Ammo ko‘ryapmizki, Armaniston bu yerda yana qandaydir o‘yin ko‘rsatmoqchi”, — dedi u.
Aliyev Rossiya va Ozarbayjonni hech qanday kelishmovchiliklarga ega bo‘lmagan strategik sheriklar deb atadi. “Biz haqiqiy strategik sherikmiz, uzoq muddatli strategik hamkorlik borasida kelishmovchiliklarimiz yo‘q. Bizning do‘stligimiz juda kuchli va shaxsan men Putin bilan juda yaqin aloqadaman, biz bir-birimizga ishonadigan siyosatchilarmiz. Bu juda muhim, mening so‘nggi tashrifim davomida ikki tomonlama kun tartibidagi masalalar muhokama qilingan”, — dedi Ozarbayjon davlati rahbari.
20-iyul kuni Vladimir Putin va Ilhom Aliyev Kremlda uchrashgandi. Rossiya prezidenti hamkasbiga Tog‘li Qorabog‘dagi vaziyatni hal qilishda murosali yechimlar topgani uchun minnatdorchilik bildirgan.
Izoh (0)