24 июль куни тонгда Исфарадаги Чоркух жамоатидаги «Қуммазор» чегара ҳудудида Тожикистон ҳамда Қирғизистон чегарачилари ўртасида қуролли тўқнашув содир бўлди. Бу ҳақда Asia-Plus хабар берган.
Агентлик манбаси берган хабарга кўра, Чоркух жамоати аҳолиси «Қуммазор»даги ерда ҳашар ўтказмоқчи бўлган.
«Аҳоли вакиллари шанбаликка чиққан вақтда қирғиз чегарачилари уларнинг ишлашига қўймади. Улар ўз ватандошларини провокация қилди ва улар тожикистонликларга тошлар отишди, чегарачилар ҳам фуқароларимизга қарата ўқ узди», – дея Asia-Plus’га маълумот берган суҳбатдош.
Воқеага гувоҳ бўлганини қайд этган фуқаронинг айтишича, «Қуммазор» қадимги шифобахш ер ва ҳар йили ҳашар йўли билан обод қилинади.
«Нима учун бизга ўзимизга тегишли ‘Қуммазор’ни тозалашимизга халақит қилишади. Бу тарихий жой, бизнинг ҳудуд ва юз йиллар давомида тожик халқи дардига шифо бўлган ер», – деган агентлик манбаси.
Шунингдек, Asia-Plus суҳбатдоши тожикистонлик чегарачилар ҳам қирғизистонликларнинг ҳужумига жавоб қайтаргани, ўқ узган аскарларга жавоб тариқасида ўқ узганини қайд этган. Отишма 10-15 дақиқа давом этган. Бироқ яраланганлар ёки бошқа жароҳатлар олганлар ҳақида маълумот берилмаган.
Исфара маъмурияти матбуот хизмати чегара ҳудудидаги жамоатда икки мамлакат чегарачилари ва аҳолиси ўртасида низо содир бўлганини тасдиқлаган ва шаҳар ҳокими раҳбарлигидаги делегация воқеа жойига борганлигини хабар қилган.
Шунингдек, Asia-Plus нашри берган ахборот бўйича маҳаллий шифокорлардан бири бир нафар яраланган аскарнинг шаҳар касалхонасига юборилганини билдирган.
«Бугун маҳаллий вақт билан тахминан соат 10:30 да ‘Қуммазор’ томондан 2002 йилда туғилган, ўнг оёғи ўқотар қурол билан яраланган аскарни олиб келишди. Биз унга биринчи тез тиббий ёрдамни кўрсатиб, Исфарадаги марказий шифохонанинг травматология бўлимига жўнатдик. Биз унинг қандай қилиб яралангани ҳақида тафсилотларни билмаймиз, аммо уни касалхонага олиб келган шериклари аскарнинг эҳтиётсизлик оқибатида ўзига ўзи жароҳат етказиб қўйганини айтди», – деган Чоркух жамоатидаги шифокор.
Қирғизистон ОАВ чегарада содир бўлган ҳодиса бўйича аниқ ахборот бермаган. «24.kg» ўз манбаларига таяниб, Боткен вилоятидаги қирғиз-тожик чегарасида отишма бўлганини хабар қилган.
«Ҳодиса бугун тахминан 10:30 да Боткен вилоятининг ‘Қуммазор’ қишлоғи яқинида юз берган. Чегарачилар ўқ узган. Дастлабки маълумотларга кўра, яраланганлар, отишма оқибатида жароҳатланганлар йўқ», – дейилади агентлик хабарида.
Кейинчалик агентлик ҳодиса жойига Қирғизистон чегарачилари, маҳаллий ҳокимлик органлари ва аҳоли вакиллари етиб келганини маълум қилган. Хабарда қайд этилишича, Тожикистон томони Қирғизистон вакилларининг ишларни тўхтатиш бўйича талабини бажармаган. Шунингдек, тожикистонликлар Қирғизистон фуқароларидан бирини дўппосламоқчи бўлган. Икки томоннинг келишувга эриша олмаслиги оқибатида ўртада жанжал чиқиб, одамлар бир-бирига тошлар улоқтиришни бошлаган.
Низо оқибатида тожикистонлик чегарачилар Қирғизистон томонга ўқ узган, бунга жавобан қирғиз чегарачилари ҳам Тожикистон томонга ўқ отган.
Қирғизистон чегарачилари ва аҳолиси орасида мазкур отишма оқибатида жароҳатланганлар йўқ.
«24.kg» Боткен вилоятида Қирғизистоннинг Боткен ҳамда Тожикистоннинг Сўғд йўналиши бўйича чегара вакиллари ўртасида учрашув бўлганини ҳам хабар қилган.
«Учрашув якунлари бўйича Қирғизистоннинг ‘Қуммазор’ ва Тожикистоннинг ‘Саманён’ (‘Дахман’) ҳудудида ишлар ўтказмаслик юзасидан келишувга эришилган», —дейилади Қирғизистон чегара хизматининг маълумотида.
Бу каби ҳолатлар яна такрорланишининг олдини олиш мақсадида чегара хизматлари вакилларининг ўз ҳудудларида қатъий тартиб-интизомга риоя этишига келишиб олинган. Шунингдек, икки республика Ички ишлар вазирликларининг бўлинмалари мазкур чегара участкаларида патруль тадбирларини олиб боради.
Қайд этилишича, учрашувда икки мамлакат туманларининг раҳбарлари ҳамда вилоятларнинг ҳуқуқ-тартибот идоралари раҳбарлари қатнашган.
Аввал 2021 йил 9 июлда қирғиз-тожик чегарасида отишма юз бергани, қирғизистонлик ҳарбий хизматчи ҳалок бўлгани хабар қилинган эди.
Изоҳ (0)